جاڭالىقتار
شەرزات پولات ىسىندەگى ديدار قالياحمەتتىڭ ايەلى تالعار تۇرعىندارىن قارىزعا باتىرعان
كوللاج: Turkystan.kz
تالعار قالاسىنىڭ تۇرعىندارى جۋرناليست رۋسلان وتەپبايعا جۇگىنىپ, 25 جاستاعى بالاۋسا ەركىنقىزىنىڭ ۇستىنەن ارىز تۇسىرگەن, دەپ حابارلايدى qandastar.kz
بالاۋسا ەركىنقىزى – شەرزات پولات ولىمىنە قاتىستى ىستە 7 جىلعا باس بوستاندىعىنان ايىرىلعان ديدار قالياحمەتتىڭ كەلىنشەگى. ولاردىڭ ورتاق ءبىر ۇل, ءبىر قىزى بار.
«4 اي بۇرىن بالاۋسا ەركىنقىزىنا 2 ملن تەڭگە كرەديت الىپ بەرگەنمىن. ءۇش ايدا جاۋىپ تاستايمىن دەگەن سوزىنە سەندىم. بىراق كرەديتتى جاپپاق تۇگىلى اي سايىنعى تولەمىن تولەمەيدى. قازىر كرەديتتى ءوزىم تولەپ جاتىرمىن. ءتورت بالام بار. بالامەن دەكرەتتە وتىرعان كەزدە كيىم ساتاتىنمىن. بالاۋسا سول كەزدەرى قارىزعا كيىم الىپ, كەيىن اقشاسىن تولەپ تۇراتىن. بىلتىر دا ءبىر كرەديت الىپ بەرگەنمىن. ونى ءوزى جاۋىپ تاستادى. سولاي سەنىمگە كىرگەن. اراعا جارتى جىل سالىپ «قايتادان الىپ بەرىڭىزشى» دەگەننەن كەيىن سەنىپ, 2 ملن تەڭگە الىپ بەردىم. قازىر ايىنا 170 مىڭنان ءوزىم تولەپ جاتىرمىن. بىراق مەن ونىڭ ديدار قالياحمەتتىڭ ايەلى ەكەنىن بىلگەن جوقپىن. ديداردىڭ سوتىندا تيكتوكقا شىعا باستاعاننان كەيىن ءبىلدىم. ءوزى وسى تالعاردا اتا-ەنەسىمەن, ياعني ديداردىڭ اكە-شەشەسىمەن تۇرادى. وعان الدانعان, ءوزىم ناقتى بىلەتىن ون شاقتى ادام بار. ودان بولەك سىرتتان, كەگەن جاقتان الدانعان بەس-التى ادام بار دەپ ەستىدىم. بالاۋسا ءوزى كەگەن جاقتىڭ قىزى», — دەيدى بالاۋسا ەسىمدى جابىرلەنۋشى.
turkystan.kz جازعانداي, 23 جاستاعى دارىن ەسىمدى جابىرلەنۋشى دە بالاۋسا ەركىنقىزىنا ءبىراز اقشا بەرگەن.
«بالاۋسامەن بۇرىن ءبىر جەردە جۇمىس ىستەگەنبىز. سول جەردەن تانىسپىز. وعان بانكتسەنتركرەديتتەن 2 ملن 68 مىڭ تەڭگە الىپ بەردىم. حالىق بانكتەن 1,5 ملن تەڭگە ءبولىپ تولەۋگە الىپ بەردىم. ودان بولەك ءوزىم 2,5 ملن تەڭگە بەردىم. كرەديتتەردى التى ايدا جاۋىپ بەرەمىن دەگەن. قازىر نەسيەنى ءوزىم تولەپ جاتىرمىن. ايىنا 240 مىڭ تولەيمىن», — دەيدى دارىن.
رۋسلان وتەپباي مەن جابىرلەنۋشىلەر بالاۋسانىڭ اتا-ەنەسىنىڭ ۇيىنە دە بارعان. بىراق قايىن جۇرتى كەلىندەرى جايلى ماردىمدى مالىمەت بەرمەگەن.
«بالاۋسانىڭ بىزگە كەلىن بولعانىنا بەس جىل بولدى. ديداردىڭ سوتىنان كەيىن توركىنىنە كەتكەن. بالالار بىزدە. اپتا سايىن بالالارىنا كەلىپ تۇرادى», — دەيدى ولار.
تولىق نۇسقاسىنا گيپەرسىلتەمە بەرۋدى ۇمىتپاڭىز: https://turkystan.kz/article/265106-serzat-polat-isindegi-didar-qaliaxmettin-aieli-talgar-turgyndaryn-qaryzga-batyrgan
