شەرزات پولاتتىڭ ناقتى نەدەن كوز جۇمعانى بەلگىلى بولدى

فوتو:Orda.kz

تالدىقورعاندا ءوتىپ جاتقان اتىشۋلى سوت وتىرىسىندا شەرزات پولاتتىڭ ولىمىنە قاتىستى مەديتسينالىق ساراپتاما قورىتىندىسى جاريا ەتىلدى, دەپ حابارلايدى  qandastar.kz     Orda.kz-كە سىلتەمە جاساپ.

بۇل — ىستەگى ەڭ ماڭىزدى دەرەكتەردىڭ ءبىرى. مارقۇمنىڭ ناقتى نەدەن قازا تاپقانى تۋرالى العاش رەت رەسمي تۇردە مالىمدەمە جاسالدى.

پروكۋرور دانا سارسەنبايدىڭ ايتۋىنشا, 2024 جىلى 4 قازانعا قاراعان ءتۇنى «قاماجاي» دۇكەنىنىڭ جانىندا بولعان جانجالدان كەيىن شەرزاتتىڭ اكەسى قارجاۋباي نۇرىموۆ جاراقات العان ۇلىن جانە ونىڭ اعاسى نۇرقاناتتى كولىگىنە وتىرعىزىپ, بار جىلدامدىقپەن تالعار اۋداندىق ورتالىق اۋرۋحاناسىنا جەتكىزۋگە اسىققان.

«سوت-مەديتسينالىق ساراپتاما قورىتىندىسىنا سايكەس, شەرزاتتىڭ ءولىمى كوپ قان جوعالتقاننان بولعان. جاراقات سول جاق وكپەنىڭ جوعارعى تۇسىنا تۇسكەن, پىشاق جۇرەككە وتە جاقىن ورنالاسقان كوكىرەك قۋىسىنا سۇعىلعان», — دەپ وقىدى پروكۋرور سوت زالىندا.

دارىگەرلەر ونىڭ ءولىمىن 2024 جىلى 4 قازان كۇنى تۇنگى 01:30-دا تالعار اۋداندىق اۋرۋحاناسىندا تىركەدى.

ەسكە سالا كەتسەك, تالعاردا 4 قازان كۇنى ءبىر توپ ادام كەلىپ دۇكەن يەسى قارجاۋباي نۇرىموۆ, ۇلى شەرزات پولات جانە اعاسى نۇرقاناتپەن جانجالداسىپ, ارتى كىسى ولىمىنە ۇلاستى. 16 جاسار شەرزات پولات قازا بولدى. بۇل ءىس قوعامدا ۇلكەن رەزونانس تۋدىردى.

9 جەلتوقسان كۇنى تاڭەرتەڭ ءجاسوسپىرىم شەرزات پولاتتىڭ اعاسى نۇرقانات عايىپباەۆتىڭ دەنەسى تابىلدى.

10 جەلتوقساندا ازات اۋىلىندا شەرزاتتىڭ اعاسى  نۇرقانات عايىپباەۆتىڭ جانازاسى وتە سالىسىمەن ارتى ۇلكەن داۋعا اينالدى. قارجاۋباي نۇرىموۆ 10 جەلتوقسان كۇنى اعاسىنىڭ جانازاسىندا ۇستالدى. ول جۇك كولىگىنىڭ توبەسىنە شىعىپ, ۇلى مەن اعاسىنىڭ ولىمىنە قاتىستى ءادىل تەرگەۋ جۇرگىزۋدى تالاپ ەتكەن بولاتىن. سوت ونى ۇساق بۇزاقىلىق پەن پوليتسيا قىزمەتكەرلەرىنە شابۋىل جاسادى دەگەن ايىپپەن 15 تاۋلىككە قاماۋ تۋرالى شەشىم شىعاردى. الايدا نۇرىموۆ بۇل ايىپتاردى جوققا شىعارىپ, تەك پوليتسيا كولىگىنىڭ دوڭگەلەكتەرىن تەسكەنىن مالىمدەدى.

وسى كەزدە پوليتسيا تۋىستارى مەن ادۆوكاتتارى وتىنگەن سوڭ, قارجاۋبايدى ۇستادىق دەپ مالىمدەگەن ەدى. قارجاۋباي نۇرىموۆتىڭ ادۆوكاتى پوليتسياعا ونىڭ جاقىندارى ۇستاڭدار دەپ ايتپاعانىن مالىمدەدى.

نۇرقانات عايىپباەۆتىڭ ولىمىنە قاتىستى وقيعانىڭ  ەگجەي-تەگجەيىن مىنا رەپورتاجدان وقي الاسىز.

ەسكە سالا كەتسەك, ءىىم ءبىرىنشى ورىنباسارى باۋىرجان الەنوۆ پەن باس پروكۋرور بەرىك اداموۆ جانە تەرگەۋ ءىسىن قولعا العان سامات ايىسوۆ 15 قازان بريفينگ وتكىزگەن. ولاردىڭ ارتىنان ۇستالعانى ءمالىم بولدى. ۇستالعانداردىڭ كىم ەكەنىن سول بريفينگتە ايتىپ بەرگەن ەدى.