شەرزات پولاتتىڭ ءۇيىن ورتەگەندەردى انىقتاۋ ءۇشىن رەسەيلىك سپۋتنيك قولدانىلماق

فوتو: تجم

باس پروكۋروردىڭ ورىنباسارى عالىمجان قويگەلديەۆ مارقۇم شەرزات پولاتتىڭ ءۇيىن ورتەۋ دەرەگىنە قاتىستى تەرگەۋ دەرەكتەرىن ءبولىستى,  دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

قويگەلديەۆ تەرگەۋ ءالى جالعاسىپ جاتىر دەيدى.

«ايتارىم, بۇعان دەيىن بىرقاتار ساراپتاما جۇرگىزىلدى. ساراپتاما قورىتىندىسى بويىنشا بەلگىلى ناتيجەلەر بار. پروتسەسس نە ءۇشىن توقتاپ قالعانىنا كەلەر بولساق, ءبىز رەسەي فەدەراتسياسىنا حالىقارالىق تەرگەۋ تاپسىرماسىن جولدادىق. ءىستىڭ تولىقتىعى ءۇشىن سپۋتنيك ارقىلى سول كەزدە جانىندا ء(ۇيدىڭ – رەد.) قانداي كولىكتەر تۇرعانىن زەرتتەمەكپىز», – دەپ ءتۇسىندىردى باس پروكۋراتۋرا وكىلى.

ەسكە سالايىق, بۇعان دەيىن تالعاردا ولتىرىلگەن ءجاسوسپىرىم شەرزات پولاتتىڭ ءۇيىن ورتەگەن كۇدىكتىلەر ءالى تابىلماعانى تۋرالى حابارلاعان ەدىك.

«تەرگەۋ جالعاسۋدا. سوتقا دەيىنگى تەرگەۋ ناتيجەلەرى تۋرالى قازىر ەشتەڭە ايتا المايمىن. قانداي دا ءبىر اقپارات پايدا بولعان كەزدە, بىردەن جاريالانادى دەپ ويلايمىن. قازىرشە تابىلعان جوق. بۇل تۋرالى ەشقانداي اقپاراتىم جوق», – دەدى باس پروكۋراتۋرانىڭ ورىنباسارى اسەت شىنداليەۆ.