«شەرزاتتى ۇرعان جوقپىن»: تالعارداعى توبەلەس ىسىندە سوتتالۋشىلاردان جاۋاپ الۋ باستالدى

“قىسىم جاسالدى”

Ulysmedia.kz جازعانداي,  سوتتا ايىپتالۋشى دارحان اسكەنتاي تەرگەۋ كەزىندە قىسىم جاسالعانىن ايتتى. ول شەرزاتتى بوقتاماعانىن, سوققىدان دەنە جاراقاتىن العانىن ايتتى.

– «توقتاڭدار, اتام, اتام!» دەگەن داۋىس شىقتى. سوسىن بالالارعا تاقاپ اتتى مىلتىقتى. تۇرىپ قالدىم تۇسىنبەي. نۇربول كۋرتكاسىن لاقتىردى. نۇربولدىڭ ارتىنان بارا جاتىپ ەدىم ءبىر بالا قۇلاپ جاتتى. ءبىر بالا سكورىي, سكورىي دەپ ايقايلاپ جاتتى. سول جەردە نۇرقانات بارىپ قۇلادى سول جەرگە. ءبىر بالالار توبەلەسىپ جاتتى. شەرزاتتىڭ دوستارى ما بىلمەيمىن. «قويىڭدار, قويىڭدار» دەگەندە ءبىر-ەكى سوققى الدىم. سوسىن تومەن ءتۇسىپ كەتىپ قالدىم, – دەدى دارحان اسكەنتاي.

اسكەنتاي شەرزات پولاتتى دا, نۇرقانات عايىپباەۆتى دا ۇرماعانىن, سوققىعا جىقپاعانىن ايتتى. سوزىنشە مىلتىقتى نۇرقانات عايىپباەۆ اتقان. دارحان اسكەنتاي وزىنە تاعىلعان ايىپپەن كەلىسپەدى.

سوتتالۋشىلارعا تاعىلعان ايىپتار:

•    ابزال شىناسىل – قك 99-بابى (ادام ءولتىرۋ), 24-بابى (قىلمىسقا دايىندالۋ جانە وقتالۋ), 293-بابى (قارۋ قولدانۋ ارقىلى بۇزاقىلىق جاساۋ)
•    راۆيل ساكيەۆ – قك 99-بابى (ادام ءولتىرۋ), 24-بابى (قىلمىسقا دايىندالۋ جانە وقتالۋ)
•    ازامات توقتاۋباەۆ – قك 293-بابى (بۇزاقىلىق), 188-بابى (ۇرلىق)
•    ديدار قالياحمەت, دارحان اسكەنتاي, نۇربول توقتاۋباەۆ, شىڭعىس بەلعوجاەۆ, نۇرقياس ءىلياسوۆ – قك 293-بابىنىڭ 3-بولىگى (قارۋ قولدانۋ ارقىلى بۇزاقىلىق جاساۋ)
•    دۋمان ىسقاق (كامەلەت جاسىنا تولماعان) – قك 434-بابى (قىلمىس تۋرالى حابارلاماۋ)

سوت كۇدىكتىلەردى كىنالى دەپ تانىسا, ولار 5 جىلدان 20 جىلعا دەيىن باس بوستاندىقتارىنان ايىرىلۋى مۇمكىن.

بۇعان دەيىن

6 مامىرداعى سوت وتىرىسى ءىس بويىنشا كۋا دەپ تانىلعان تالعار اۋداندىق پوليتسيا باسقارماسىنىڭ كريمينالدى پوليتسيا ءبولىمىنىڭ باسشىسى مەدەت ءادىلجاننان جاۋاپ الۋدان باستالعان بولاتىن. ول وقيعا بولعان كۇنى مارقۇم شەرزات پولاتتىڭ نەمەرە اعاسى نۇرقانات عايىپباەۆتان جاۋاپ العان.

كۋاگەرلەر

بۇعان دەيىن ەكىنشى كۋاگەر دانا جاقسىكەلدى جاۋاپ بەرگەن بولاتىن. سونىمەن قاتار, ۇشىنشى كۋاگەر يۋلداش روزىباكيەۆ سوتتالۋشى ابزال مەن نۇرقياستى عانا تانيتىنىن ايتتى. ول قالعان سوتتالۋشىلاردى تانىمايتىنىن جەتكىزدى. شەرزات ىسىندە تاعى ءبىر كۋاگەر ارلان قازىكەنوۆ جاۋاپ بەردى.

ودان بولەك, 28 ءساۋىر كۇنى تالعارداعى قاندى توبەلەستە قازا تاپقان شەرزات پولاتتىڭ ولىمىنە قاتىستى سوت پروتسەسىنە بەسىنشى كۋاگەر سامات ابدىقادىر كەلىپ, تاراپتاردىڭ سۇراعىنا جاۋاپ بەردى. سامات – سوتتالۋشى ديدار قالياحمەتوۆتىڭ باۋىرى.

سوتتا كۇدىكتىنىڭ تاعى ءبىر باۋىرى داۋلەت مۇراتوۆ تا كەلىپ, تاراپتاردىڭ سۇراعىنا جاۋاپ بەردى.

سونىمەن قاتار, شەرزات سوتىندا قارجاۋبايعا سىرا ءۇشىن اقشا جىبەرگەن كۋاگەر بەكنۇر اسقاربەك جاۋاپ بەردى. ال شەرزات مەرت بولعان كۇنى كەلگەن پوليتسەي كۇدىكتىنىڭ سىنىپتاسى بولىپ شىقتى. ودان بولەك, شەرزات ولىمىنە بايلانىستى سوت پروتسەسىندە مەملەكەتتىك ايىپتاۋشى مارقۇم نۇرقانات عايىپباەۆتىڭ جاۋاپتارىن وقىدى. نۇرقانات تەرگەۋ كەزىندە وقيعا ورنىندا بولعان ەكى قىزعا قاتىستى كۇتپەگەن دەرەكتەر ايتتى.

شەرزات پولات ءىسى بويىنشا تىكەلەي ەفيردى  ۇلىستىڭ Youtube-ارناسىنان كورە الاسىزدار.