شەشەنستاندا پوليتسەيلەرگە شابۋىلداعان ءجاسوسپىرىمدى بيلىك ءولتىرىپ, دەنەسىن الاڭعا شىعارىپ قويعان

فوتو: GroznyiTV

7 ءساۋىر كەشكە شەشەنستاننىڭ اچحوي-مارتاندا بەلگىسىز بىرەۋ پاترۋلدىك پوليتسيا قىزمەتكەرلەرىنە پىشاقپەن شابۋىل جاساعان. سالدارىنان ءبىر پوليتسەي اۋرۋحانادا كوز جۇمدى. كەلەسى كۇنى كۇدىكتىنى ۇستاپ, ونىڭ دەنەسىن الاڭعا قويىپ قويعان. رامزان قادىروۆ شابۋىل جاسادى دەگەن ءجاسوسپىرىمنىڭ تۋىستارىن شەشەنستاننان شىعارۋدى تالاپ ەتتى, دەپ جازدى qandastar.kz

بۇل تۋرالى Stan.kz اقپارات اگەنتتىگى ۆۆس ارناسىنا سىلتەمە جاساپ حابارلايدى.

دۇيسەنبى ساعات 21:00 شاماسىندا اچحوي-مارتان تۇرعىنى جول پوليتسياسى بەكەتىندە كەزەكشى پوليتسيا قىزمەتكەرلەرىنە پىشاقپەن شابۋىل جاسادى.

بەينەباقىلاۋ كامەراسىنان جىگىتتىڭ دۇكەننەن شىعىپ جاتقانىن كورۋگە بولادى. جول بويىندا شامدارى جانىپ تۇرعان پوليتسيا كولىگى تۇر. كولىكتىڭ قاسىندا ءۇش ادام بار. شابۋىلشى ولارعا قاراي جۇگىرىپ, بىرىنشىسىنە شابۋىل جاسايدى. ول پوليتسەيدى جەرگە قۇلاتادى, سول كەزدە وق اتىلادى.

اچحوي-مارتان – قالا تيپتەس ەلدى مەكەن, دەگەنمەن شەشەندەر ونى قالا دەپ اتايدى. ول گروزنىيدان وڭتۇستىك-باتىسقا قاراي 50 شاقىرىمداي جەردە, تاۋ ەتەگىنە جاقىن ورنالاسقان. وندا 30 مىڭنان استام ادام تۇرادى.

ءدال وسىنداي وقيعا مۇندا ءبىر جىل بۇرىن بولدى. اچحوي-مارتانوۆ اۋدانىنداعى ستارىي اچحوي اۋىلىندا قارۋلانعان ءۇش ادام پوليتسيا قىزمەتكەرلەرىنە شابۋىل جاسادى.

7 ساۋىردە ءبىر پوليتسيا قىزمەتكەرى اۋىر پىشاق جاراقاتىن الىپ, اۋرۋحانادا مەرت بولدى. تاعى ەكەۋى جاراقات الدى. تەرگەۋ كوميتەتى قۇقىق قورعاۋ ورگاندارى قىزمەتكەرلەرىن ولتىرۋگە وقتالۋ ءىستى تەرگەپ جاتىر.

9 ساۋىردە اچحوي-مارتانداعى بيۋدجەت سالاسىنىڭ بارلىق قىزمەتكەرى قالا ورتالىعىنداعى ميتينگىگە جينالدى. بىراق ول ميتينگ ادەيى ۇيىمداستىرىلعان ەكەن.

ميتينگكە ءماجبۇرلى تۇردە قاتىسۋشىلاردىڭ ءبىرى جينالعانداردىڭ الدىنا اكىمدىك باسشىسى حوزا بۋرساگوۆ پەن اۋداننىڭ يسلام قازىسى ابدۋراشيد دادۋەۆ شىقتى دەدى. سول كەزدە كولىك توقتاپ, ىشىنەن ورالعان قاندى نارسەنى الىپ شىققان. بۇل بيلىك پوليتسيا قىزمەتكەرلەرىنە شابۋىل جاسادى دەپ ايىپتالعان ءجاسوسپىرىمنىڭ دەنەسى ەدى.

اچحوي-مارتان اكىمشىلىگىنىڭ جانىندا بىر توپ ادام جىگىتتىڭ دەنەسىن قورشاپ الدى. كۋاگەرلەردىڭ ايتۋىنشا, بىرنەشە ايەل ەسىنەن تانىپ قالعانىمەن, ميتينگىدەن ەشكىمدى شىعارۋعا رۇقسات ەتپەگەن.

رەسەي پرەزيدەنتى جانىنداعى ادام قۇقىقتارى جونىندەگى كەڭەستىڭ مۇشەسى ەۆا مەركاچەۆا اچحوي-مارتاندا بولعان وقيعانى «جابايىلىق» جانە «باياعى زامان» دەپ اتادى.

«بۇل ەشقانداي قۇقىقتىق نورمالارعا سايكەس كەلمەيدى. ادامزات قاندى قاقتىعىستاردان, ءولىم جازاسىنان جانە قاتىگەزدىكتى كوپشىلىككە كورسەتۋدەن قۇتىلۋ ءۇشىن دامىدى. بولىپ جاتقان جاعداي, مەنىڭ ويىمشا, مادەنيەت پەن وركەنيەتكە كەرى قادام», – دەدى ول.

اچحوي-مارتانداعى شابۋىلدان كەيىن رامزان قادىروۆ قاۋىپسىزدىك كۇشتەرىمەن كەزدەسۋ وتكىزدى.

«بۇل نەكەسىز بالاعا كەلسەك: اتا-اناسى, اعاسى بولسا, ولاردىڭ بارلىعىن رەسپۋبليكادان شىعارۋ كەرەك. ولاردىڭ شەشەنستانداعى جانە ماسكەۋدەگى مۇلكىن تاركىلەۋ كەرەك», – دەدى قادىروۆ.

ول وسىلاي جاساعاندارعا قانداي جازا بولاتىنىن ايتتى.

• ءبىرىنشىسى – م ۇلىكتى تاركىلەۋ, ساتۋ جانە اقشانى مۇقتاج جاندارعا كومەك رەتىندە تاراتۋ;
• ەكىنشىسى – ءبىر ايدان كەيىن تۋىستارىنىڭ مۇلكىن تارتىپ الىپ, ولاردى دا رەسپۋبليكادان قۋىپ جىبەرۋ.

رامزان قادىروۆ پوليتسەيلەرگە شابۋىل جاساعان ءجاسوسپىرىم شەتەلدىكتەردىڭ پروپاگانداسىنا ەردى دەپ, ۋكراينانى كىنالادى. تۇركيادا ورنالاسقان توپتىڭ ارەكەتىن بەلگىلى ءبىر «ۋكراينا ازاماتى» باسقارعان, ال ولار ءجاسوسپىرىمدى باسقارىپ تۇرعان كورىنەدى.

ۋكراينا بيلىگى قادىروۆتىڭ مالىمدەمەسىنە قاتىستى پىكىر بىلدىرگەن جوق.

«ىشكى ىستەر مينيسترلىگى مەن رەسەي ۇلتتىق گۆاردياسى فسب-مەن بىرلەسىپ, وسىنىڭ ارتىندا تۇرعانداردىڭ اكەلەرى مەن اعالارىن رەسپۋبليكا اۋماعىنان شىعارۋى كەرەك. ولاردىڭ دۇنيە-مۇلكى تاركىلەنۋى كەرەك… وسىدان كەيىن ولار ۋكرايناعا جۇمىس ىستەۋىن توقتاتپاسا, باسقا تۋىستارىن دا شىعارۋ كەرەك», – دەدى شەشەنستان باسشىسى.

پىشاقپەن شابۋىل جاساعان ادامنىڭ وتباسى مۇشەلەرى ءالى پوليتسيا بولىمشەلەرىندە, ولاردىڭ نە بولىپ جاتقانى تۋرالى ناقتى اقپارات جوق. ولار ءجاسوسپىرىمنىڭ تىستارىن سوعىسقا جىبەرۋ ارقىلى كىناسىنىڭ ءبىر بولىگىن وتەۋدى ۇسىنىپ وتىرتدەيدى. ياعني ۋكرايناعا قارسى سوعىسقا بىرنەشە ەر تۋىستارىن جىبەرەدى.