جاڭالىقتار
شەشىم قابىلداندى: ماسكەۋ بيرجاسى KASE اكتسيونەرلەرى قۇرامىنان كەتەدى
قازاقستان ۇلتتىق بانكىنىڭ باسشىسى تيمۋر سۇلەيمەنوۆ بۇگىن, 11 قازاندا وتكەن بريفينگتە ماسكەۋ بيرجاسىنا ەنگىزىلگەن سانكتسيالاردىڭ سالدارى جانە ونىڭ قازاقستان نارىعىنا اسەرى تۋرالى ايتىپ بەردى, دەپ حابارلايدى qandastar.kz Ulysmedia.kz سىلتەمە جاساپ.
سانكتسيالار مەن موسبيرجانىڭ شەشىمى
– موسبيرجا سانكتسيالارعا ۇشىراپ, ولاردىڭ ستاتۋسى ءبىزدىڭ بيرجامىزدىڭ قىزمەتىنە كەدەرگى كەلتىرەتىنىن سەرىكتەستىك كەزىندە حاباردار ەتتى. سوندىقتان KASE اكتسيونەرلەرىنىڭ قۇرامىنان موسبيرجانىڭ شىعۋى تۋرالى شەشىم قابىلداندى, – دەدى تيمۋر سۇلەيمەنوۆ.
بۇل شەشىمدى ەكى تاراپ تا قولداعان, ەندى موسبيرجا قازاقستان قور بيرجاسى (KASE) اكتسيونەرلەرىنىڭ قۇرامىنان كەتەدى.
ارى قاراي نە بولادى
KASE جاقىن ارادا رەسەي نارىعىمەن ءوزارا ءىس-قيمىلعا قاتىستى الداعى قادامداردى تۇسىندىرەتىن رەسمي مالىمدەمە تاراتۋعا ۋادە ەتكەن. الايدا قازىر بيرجانىڭ جاڭا كەزەڭى باستالىپ, اكتسيونەرلەر وزگەرىستەرگە دايىن بولۋى كەرەكتىگى تۇسىنىكتى.
– موسبيرجا شىعۋ تۋرالى شەشىم قابىلدادى جانە جاقىن ارادا KASE اكتسيونەرلەرى اراسىندا بولمايدى, – دەپ قورىتىندىلادى سۇلەيمەنوۆ.
ماسكەۋ بيرجاسى
ماسكەۋ بيرجاسى اكتسيالاردىڭ 13,1% يەلىك ەتەدى. سونىمەن قاتار, ۇيىم ستراتەگيالىق سەرىكتەس, ونىمەن بىرقاتار كەلىسىمدەر جاسالعان.
بۇعان دەيىن KASE باسشىسى موسبيرجاعا قارسى سانكتسيالار تۋرالى ايتقان بولاتىن. الينا الدامبەرگەن بيرجا اكتسيونەرلەرىندە سانكتسيالىق تۇلعانىڭ بولۋى قازاقستاندىق قاتىناستارعا جانە شەتەلدىك قارجى ۇيىمدارىمەن, سەرىكتەستەرمەن قارىم-قاتىناستاردى قولداۋعا اسەر ەتەتىنىن ايتقان.
12 شىلدەدە ۇلتتىق بانك باسشىسى تيمۋر سۇدەيمەنوۆ موسبيرجاعا قاتىستى سانكتسيالارعا بايلانىستى KASE جانە AIX بىرلەستىگى قازىر كىدىرىپ تۇرعانىن حابارلاعان.
