Shetelde dańqty otandastarymyzdy shyqqan tegine qaramastan únemi qazaqtar dep ataıdy — Toqaev

Prezıdent Qazaqstan qoǵamynyń ortaq ıdealdar men qundylyqtar biriktirgen erkin ári jaýapkershiligi mol azamattardyń odaǵy ekenin aıtty. Bul týraly  Memleket basshysy Qasym-Jomart Toqaev Qazaqstan halqy Assambleıasynyń «Ádiletti Qazaqstan: birlik, turaqtylyq, damý» atty HHHII sessııasynyń otyrysynda málimdedi, dep habarlaıdy “Adyrna” ulttyq portaly.

Sessııa barysynda prezıdent shetelde tanymal qazaqstandyqtardyń barlyǵyn qazaq dep biletinin aıtty.

«Dańqty otandastarymyzdy, sportshylarymyzdy, mádenıet qaıratkerlerimizdi, ǵalymdarymyz ben stýdentterimizdi, kásipkerlerimizdi shyqqan tegine qaramastan, shetelde únemi qazaqtar dep ataıdy. Bul – tabıǵı qubylys. Solaı bolýǵa tıis.  Bizdiń qoǵam – ortaq ıdealdar men qundylyqtar biriktirgen erkin ári jaýapkershiligi mol azamattardyń odaǵy. Bul – jalpyulttyq biregeıligimizdiń taǵy bir jarqyn kórinisi», – dedi memleket basshysy.

Qasym-Jomart Toqaev Qazaqstan azamattarynyń barlyǵy ózderin úlken ári birtutas qazaq otbasynyń, shyn máninde, qazaq ultynyń múshesi sezinetinin aıta ketti.

«Biz bárimiz – bir otbasymyz. Bul – artyq aıtqandyq emes. Bul – bizdiń shynaıy bolmysymyz. Osy rette biz maqtanysh etetin etnomádenı áralýandyǵymyz eshqaıda joǵalyp ketpeıdi. Kerisinshe, birtutas azamattyq negiz esebinen nyǵaıa túsedi. Elimizde túrli mádenıet dástúrleri jalpyulttyq biregeıliktiń berik irgetasy bolyp qalanatyn ózimizge tán aıryqsha ómir súrý salty qalyptasty. Osynaý erekshe biregeıligimiz ýaqyt tezine tótep berip, qoǵamdyq sananyń ózegine aınaldy», – dedi Qazaqstan prezıdenti QHA otyrysynda.