شەتەلدەگى قازاق وقۋشىلارى اراسىندا ادەبي بايقاۋ ءوتتى

شەتەلدە تۇراتىن قازاق دياسپوراسىنىڭ وقۋشىلارى اراسىندا « ۇلى دالا ەلى» ادەبي جۇمىستاردىڭ حالىقارالىق شىعارماشىلىق بايقاۋى ءوتتى.

قازاقستان رەسپۋبليكاسى اقپاراتتىق جانە قوعامدىق دامۋ مينيسترلىگى, «وتانداستار قورى» كەاق, دۇنيەجۇزى قازاقتارىنىڭ قاۋىمداستىعىنىڭ ۇيىمداستىرۋىمەن شەتەلدە تۇراتىن قازاق دياسپوراسى وقۋشىلارىنىڭ اراسىندا « ۇلى دالا ەلى» اتتى حالىقارالىق ادەبي شىعارماشىلىق كونكۋرسى ءوتتى.

اتالعان بايگەگە شىعارمالار وسى كوكتەمنىڭ 1 ساۋىرىنەن 30 مامىرى ارالىعىندا قابىلدانعان. ۇستەگى جىلدىڭ 1-10 ماۋسىم كۇندەرى قازىلار القاسى كەلىپ تۇسكەن جۇمىستاردى ساراپتاپ, قورىتىندىلاعان.

شەتەلدە تۇراتىن قازاق دياسپوراسى وقۋشىلارى اراسىندا وتكەن « ۇلى دالا ەلى» اتتى ادەبي جۇمىستاردىڭ حالىقارالىق شىعارماشىلىق بايقاۋىنا بالالاردىڭ 1- جاس توبى بويىنشا بايقاۋعا 19 جۇمىس, 2 – جاس توبى بويىنشا 15 جۇمىس كەلىپ تۇسكەن. بايقاۋعا قابىلدانعان بارلىق 34 جۇمىستى كوميسسيا مۇشەلەرى ىرىكتەدى. وندا ەڭ باستى كريتەري رەتىندە جۇمىستىڭ تاقىرىبى مەن وزەكتى ويىنىڭ سايكەستىگى باستى نازاردا بولدى. سونداي-اق, تاقىرىپتىڭ تولىق اشىلۋى, ويدىڭ بەرىلۋ ءتاسىلى سياقتى تەتىكتەرگە سۇيەندى.

«جالپى شىعارمالاردىڭ بارلىعى دا تاقىرىپقا ساي جازىلعان. بالالار نەگىزگى يدەيانى اشۋعا تىرىسقان. الايدا جۇمىستاردىڭ كەيبىرى تاقىرىپتى تولىق اشىلماي جاتىر. ونىڭ باستى سەبەپتەرىنىڭ ءبىرى – كەيبىرىنىڭ تىم قىسقا بولۋى, ەندى بىرەۋلەرىنىڭ تەك بايانداۋ مەن سيپاتتاۋعا عانا قۇرۋلۋى سىندى قاتەلىكتەر ورىن العان. كوبىنە قۇرعاق فاكتىلەردى ءتىزىپ شىعۋ (ماسەلەن, ەلىمىزدىڭ تاريحىنا بايلانىستى, ت.س.س.) سىندى ولقىلىقتار ورىن الىپ وتىر. دەگەنمەن, ەسسەگە قويىلاتىن تالاپتاردىڭ بارلىعىن ساقتاي وتىرىپ, وزىندىك وي-تۇجىرىمدارىن ەرەكشە تاسىلمەن بەرە بىلگەن وقۋشىلار دا بار. اسىرەسە, ءى جاس توبىندا (13-15 جاس ارالىعىنداعى بالالار) سولتانوۆ رايحات, اسىلباشەۆا كاميليا, بايتۋللا باتان ۇلى, سۋلەيمەنوۆ ماساليم سياقتى جاس تالانتتاردىڭ, سول سياقتى ءىى جاس توبىندا (16-18 جاس ارالىعىنداعى وقۋشىلار) ەركىنبەك اقتوتى, امەنوۆا اليما, بەكتۇر ابدۋلحاكيم, حاستي ءابدولازيز سىندى جەتكىنشەكتەردىڭ ەڭبەكتەرىن ەرەكشە اتاپ وتكىمىز كەلەدى», – دەيدى قازىلار القاسىنىڭ مۇشەسى اينۇر امانگەلدىقىزى. ايتا كەتەيىك, قازىلار القاسىنىڭ قۇرامىندا س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ وقىتۋشىلارى اينۇر امانگەلدىقىزى, بۋلات اياپبەرگەنوۆ جانە گۋلجيحان انۋاربەكقىزى سىندى كاسىبي ماماندار جۇمىس اتقاردى.

ساراپتاما كوميسسياسىنىڭ شەشىمى بويىنشا ءى جاس توبى 13-15 جاس ارالىعى بويىنشا: 1-ورىن. سولتانوۆ رايحات,  2-ورىن. اسىلباشەۆا كاميليا, 3-ورىن. بايتۋللا باتان ۇلى, 4-ورىن. سۋلەيمەنوۆ ماساليم بۇيىرسا, ءىى جاس توبى 16-18 جاس ارالىعى بويىنشا: 1-ورىن. ەركىنبەك اقتوتى, 2-ورىن. حاستي ءابدولازيز, 3-ورىن. امەنوۆا اليماعا, 4-ورىن. بەكتۇر ابدۋلحاكيمگە بۇيىردى.

جەڭىسكە جەتكەن 8 قاتىسۋشىدان  4 ۇزدىك جۇمىس اۆتورلارى سولتانوۆ رايحات (رەسەي), اسىلباشەۆا كاميليا (شۆەتسيا), ەركىنبەك اقتوتى (موڭعوليا), حاستي ءابدولازيز (يران) اتامەكەنى قازاقستانعا كەلەتىن جولداما جەڭىپ الدى.