Baıdennan kómek: USAID Qazaqstandaǵy qandaı «jalǵan aqparatpen» kúresti?

Foto: REUTERS

Bılik basyna kelgen Tramp bilek sybana qyzmetke kiristi. Aldymen ol barlyq sheteldik kómek baǵdarlamalaryn toqtatý týraly buıryqqa qol qoıdy. Maqsat – olardyń AQSh-tyń jańa ákimshilik saıası maqsattaryna sáıkestigin tekserý. Alaıda AQSh federaldy soty Prezıdenttiń bul Jarlyǵymen kelispeıdi. Jaqynda Aq úıdiń baspasóz hatshysy shyǵyndardy jipke tizip, basyn ashyp aıtty. Halyqaralyq gýmanıtarlyq uıymdar bolsa, bul ózgeristiń saldary aýyr  dep otyr. Álemdi ábigerge salǵan máselege qandastar.kz sholý jasady.

Aq úıdiń habarlaýynsha,  ákimshilik-bıýdjettik saıasat basqarmasy (OMB) bıýdjet shyǵyndaryna taldaý júrgizip jatyr jáne AQSh-tyń jańa Prezıdentiniń maqsattaryna sáıkes keletin baǵdarlamalardy saqtaý boıynsha federaldy vedomstvolardyń usynystaryn qarastyrýǵa daıyn.

«Baıdenniń ákimshiligi aqymaqtyqqa jol bergen. Sanamalasaq, Gvatemaladaǵy «jynys aýystyrý» baǵdarlamasyna 2 mıllıon dollar jumsalǵan. Bul týraly Májilis depýtaty Magerram Magerramov ta sóz qozǵap, qoǵamǵa jat áseri bar baǵdarlamalardy tekserýge shaqyrdy. Sebebi 2022-2025 jyldary USAID Ortalyq Azııada adam quqyqtary men teńdikti nyǵaıtýǵa $2 mln bólingen. Bul baǵdarlamanyń atqarýshysy –  Eýropalyq halyqaralyq lesbı, geı, bıseksýal, transgender jáne ınterseks qaýymdastyǵy. Buǵan qosa Qazaqstandaǵy «jalǵan aqparatqa qarsy kúreske» 4,5 mıllıon dollar bólingen», – dep qosty Aq úıdiń baspasóz hatshysy Karolın Levıtt.

Levıtt  naqty qandaı «jalǵan aqparat» ekenin jarııa etýden jaltardy.

Taǵy bir mańyz berer tus, kúni keshe Memlekettik hatshy Marko Rýbıo AQSh halyqaralyq damý agenttigin (USAID) basqarýshy mindetin ýaqytsha qosa atqaratyn boldy. Buǵan qatysty memlekettik departament málimdeme jarııalap, «USAID bastapqy mıssııasynan áldeqashan aýytqyp ketti – Amerıka múddelerin shetelde alǵa jyljytýǵa jaýapty edi, USAID qarjysynyń edáýir bóligi AQSh-tyń negizgi ulttyq múddelerine sáıkes kelmeıtini endi belgili boldy» dedi.

5 aqpanda USAID búkil álem boıynsha qyzmetkerlerin ákimshilik demalysqa jiberetinin habarlady.

Aıta keteıik, USAID álemniń 100-den astam elinde amerıkalyqtar atynan kómek kórsetip kelgen.  Uıym Qazaqstanǵa qol sozýdy 1992 jyly bastaǵan. Sodan beri USAID arqyly eldegi ekonomıkalyq sektor, densaýlyq saqtaý júıesi jáne demokratııalyq ınstıtýttar boıynsha baǵdarlamalarǵa qarjy bólingen edi.