شەتەلدىك ازاماتتاردى ازاپتاعان پوليتسەيلەر سوتتالدى

فوتو: اشىق دەرەككوز

الماتى وبلىسىندا لاۋازىمدىق وكىلەتتىكتەرىن اسىرا پايدالانعان التى پوليتسيا قىزمەتكەرىنە قاتىستى سوت ۇكىمى شىقتى, – دەپ حابارلايدى qandastar.kz 

الماتى وبلىسى قاراساي اۋداندىق سوتى قىزمەتى ءمالىم ەتكەندەي, 2022 جىلدىڭ قاڭتارىندا 44 جابىرلەنۋشى, ونىڭ ىشىندە وزبەكستان, تاجىكستان جانە قىرعىزستان ازاماتتارى پوليتسيا باسقارماسىنىڭ ارنايى قابىلداعىشىنا ورنالاستىرىلدى.

– سوتتالۋشىلار وزدەرىنىڭ لاۋازىمدىق وكىلەتتىكتەرىن پايدالانا وتىرىپ, زاڭعا قايشى ارەكەتتەر جاسادى, ناتيجەسىندە زارداپ شەككەندەر ازاپتالدى, – دەپ حابارلادى قاراساي اۋداندىق سوتىنىڭ ءباسپاسوز قىزمەتى.

پروكۋرور سۋديادان سوتتالۋشىلاردى كىنالى دەپ تانىپ, ولاردى 3 جىلعا باس بوستاندىعىنان ايىرۋدى سۇرادى.

ال قورعاۋشى تاراپ سوتتالۋشىلاردى اقتاۋدى سۇرادى.

سوتتالۋشىلاردىڭ كىناسى كۋاگەرلەردىڭ ايعاقتارىمەن, ساراپتامالاردىڭ قورىتىندىلارىمەن, سوتتا راستالعان جانە زەرتتەلگەن باسقا دا دالەلدەمەلەرمەن تولىق دالەلدەندى.

– سوت ۇكىمىمەن 6 پوليتسيا قىزمەتكەرى 146-باپتىڭ 1-بولىگىندە (2023 جىلعى 17 ناۋرىزعا دەيىن رەداكتسيادا) جانە قك-ءنىڭ 362-بابى 1-بولىگىندە كوزدەلگەن قىلمىس جاساعانى ءۇشىن كىنالى دەپ تانىلدى, قىلمىستىق قۇقىقبۇزۋشىلىقتاردىڭ جيىنتىعى بويىنشا قك-ءنىڭ 58-بابى 2-بولىگىنە سايكەس ارقايسىسىنا 3 جىل مەرزىمگە باس بوستاندىعىنان ايىرۋ جازاسى تاعايىندالدى, – دەلىنگەن حابارلامادا.