شقو-دا جۇمىس ۋاقىتىن وزگەرتۋ ماسەلەسى قارالىپ جاتىر

فوتو: اشىق دەرەككوز

شىعىس قازاقستان وبلىسىنىڭ اكىمى ەرمەك كوشەرباەۆ ۋاقىت بەلدەۋىنىڭ اۋىسۋىنا بايلانىستى ايماقتا جۇمىس ۋاقىتىن وزگەرتۋ قارالىپ جاتقانىن ايتتى, دەپ جازدى qandastar.kz

«ۋاقىتتى وزگەرتۋ جەرگىلىكتى بيلىكتىڭ قۇزىرەتىنە كىرمەيدى. بۇل شەشىم ۇكىمەتتە قابىلدانعان, مۇنى وزگەرتە المايمىز. تۇرعىنداردا قيىندىقتار بولعان شىعار. كەيبىرى «بالالاردى كەشكە جاقىن مەكتەپتەن الىپ كەتەمىز» دەيدى. قازىرگى جاعدايدا بۇرىنعى ۋاقىت بەلدەۋىمەن قاراساق تاڭەرتەڭ قاراڭعىدا بالالاردى مەكتەپكە اپارىپ, قاراڭعىدا الىپ كەتەر ەردىڭىز. مەنىڭ ايتىپ وتىرعانىم, ۋاقىت بەلدەۋىنە ۇيرەنۋ كەرەك. ەكىنشى جاعىنان, تۇرعىنداردىڭ وي-پىكىرىن ءتيىستى ورگاندارعا جەتكىزدىك», – دەدى ول.

كوشەرباەۆ ايماق تۇرعىندارىنىڭ جاڭا ۋاقىت بەلدەۋىنە بەيىمدەلۋىن جەڭىلدەتۋ ءۇشىن جۇمىس ۋاقىتىن وزگەرتۋ ماسەلەسى قارالىپ جاتقانىن ايتتى.

«سونىڭ ىشىندە اۋرۋحانا, دۇكەندەر, مەكتەپتەردىڭ, ساعات سايىن جۇرەتىن قوعامدىق كولىكتەردىڭ كەستەسىن قايتا قاراۋ ارقىلى جاڭا ۋاقىت بەلدەۋىنە ۇيرەتۋدى قاراستىرىپ جاتىرمىز», – دەپ قوستى اكىم.

ەرمەك كوشەرباەۆ جۇمىس ۋاقىتىن وزگەرتۋ ماسەلەسى ءالى دە حالىقپەن تالقىلاناتىنىن جەتكىزدى.