شقو-نىڭ تاعى ءتورت اۋدانى ء«وز ۋاقىت بەلدەۋىنە» كوشتى

وبلىس اكىمدىگى اقپاراتىنا سۇيەنسەك, ەندى تارباعاتاي, زايسان, كۇرشىم جانە سامار اۋداندارىنىڭ تۇرعىندارى جۇمىستى تاڭعى 08:00-دە باستاپ, 17:30-دا اياقتايدى. تۇسكى ءۇزىلىس 12:00-دەن 13:30-عا دەيىن بەلگىلەنگەن.

«بۇل جاڭاشىلدىق ءوڭىردىڭ تابيعي ەرەكشەلىكتەرىمەن – ەرتە تاڭ اتىپ, كۇننىڭ ەرتە باتۋىمەن بايلانىستى. جاڭا كەستە تۇرعىندارعا كۇندىزگى جارىقتى ءتيىمدى پايدالانۋ مۇمكىندىگىن بەرەدى. وزگەرىستەر مەكتەپتەرگە, بالاباقشالارعا جانە مەديتسينالىق مەكەمەلەرگە اسەر ەتپەيدى, سەبەبى ولار بۇعان دەيىن وسى كەستە بويىنشا جۇمىس ىستەپ كەلگەن»,- دەلىنگەن اقپاراتتا.

Zakon.kz جازعانداي, زايسان اۋدانىنىڭ اكىمى اەليتا احمەتسəلىمقىزى بۇل شەشىم جەرگىلىكتى تۇرعىنداردىڭ پىكىرى ەسكەرىلە وتىرىپ قابىلدانعانىن اتاپ ءوتتى.

«بۇل شەشىمدى قابىلداماس بۇرىن, ءبىز ءار اۋىلدىق وكرۋگتە جينالىستار وتكىزدىك, تۇرعىندار بۇل باستامانى قولدادى. سەبەبى, زايسان اۋدانى شىعىس قازاقستان وبلىسىنىڭ شىعىس شەكاراسىنا ەڭ جاقىن ورنالاسقان, سوندىقتان بىزدە كۇن ەرتە شىعادى, ياعني جارىق كۇن دە ەرتە باستالادى. سول سەبەپتى, جۇمىس كۇنىنىڭ 08:00-دە باستالىپ, 17:30-دا اياقتالعانى حالىق ءۇشىن الدەقايدا قولايلى – جۇمىستان كەيىن ءۇي شارۋاسىنا, بالالارعا جانە جاقىندارىنا كوبىرەك ۋاقىت قالادى», – دەدى زايسان اۋدانىنىڭ اكىمى اەليتا احمەتسəلىمقىزى.