شقو تۇرعىنى 30 جىلدان استام ۋاقىت ەش قۇجاتسىز ءومىر سۇرگەن

شىعىس قازاقستان وبلىسىنىڭ تۇرعىنى 30 جىلدان استام ۋاقىت بويى ەش قۇجاتسىز جۇرگەن,- دەپ حابارلايدى كازينفورم.

شقو پوليتسيا دەپارتامەنتىنىڭ مالىمەتىنە سۇيەنسەك, تارباعاي اۋدانىنىڭ 56 جاستاعى تۇرعىنى وتىز جىلدان استام ۋاقىت بويى ءوزىنىڭ جەكە باسىن راستايتىن قۇجاتسىز جۇرگەن.

ونىڭ تۋ تۋرالى كۋالىگى بولعان, بىراق اتا-اناسىنىڭ ەكەۋىنەن دە ەرتە ايىرىلعان سوڭ قۇجاتتارىن ۋاقىتىلى رەتتەيتىن ەشكىم بولماعان.

ال كامەلەت جاسىنا تولعاننان كەيىن قۇجاتتاردى رەسىمدەمەي جۇرە بەرگەن.

«پوليتسەيلەر ەر ادامعا قاجەتتى قۇجاتتاردى جيناۋعا كومەكتەسىپ, تۋ تۋرالى كۋالىكتىڭ تەلنۇسقاسىن جاساتتى. سونىمەن قاتار ونىڭ كسرو ىدىراعاننان كەيىن ەشبىر ەلدىڭ ازاماتتىعىن الماعانى انىقتالدى. بارلىق قاجەتتى قۇجاتتى جيناعاننان كەيىن كوشى-قون قىزمەتىنىڭ ماماندارى اۋىل تۇرعىنىنا قازاقستان رەسپۋبليكاسى ازاماتىنىڭ العاشقى جەكە كۋالىگىن تابىس ەتتى», — دەلىنگەن اقپاراتتا.
ەندى تارباعاي اۋدانىنىڭ تۇرعىنى الەۋمەتتىك جانە مەديتسينالىق قىزمەتتەردى ەش قيىندىقسىز الىپ, زەينەتاقى قورىنا تىركەلە الادى.

جىل باسىنان بەرى شىعىس قازاقستان پوليتسەيلەرى وسىنداي جاعدايعا تاپ بولعان 28 ازاماتقا كومەكتەسكەن.