شۋ وزەنىنىڭ ارناسى زاڭسىز بۇرىلعان جوق: مينيسترلىك ماقسات تولىقبايدىڭ ءسوزىن جوققا شىعاردى

دەپۋتات كوتەرگەن وسى ماسەلەگە بايلانىستى بۇگىن سۋ رەسۋرستارى جانە يرريگاتسيا مينيسترىلىگى جاۋاپ بەردى.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ تاپسىرماسى بوينشا جامبىل وبلىسىنىڭ «قازسۋشار» فيليالى مەن شۋ-تالاس باسسەيندىك ينسپەكتسياسىنىڭ باسشىلارى سوزاق اۋدانىنا باردى. تەكسەرىس بارىسىندا شۋ وزەنى ارناسىن ءوز بەتىنشە بۇرۋ جانە زاڭسىز بوگەت تۇرعىزۋ فاكتىسى انىقتالعان جوق.

بارلىق سۋارمالى القاپتار جانە سۋ پايدالانۋشىلار سۋ رەسۋرستارىنىڭ بولىنگەن كولەمىندە (ليميتتە) سۋمەن قامتاماسىز ەتىلۋدە.

اتاپ ايتقاندا, 2024 جىلدىڭ قىركۇيەك ايىنان باستاپ تاسوتكەل سۋ قويماسىنان شۋ وزەنىنىڭ تومەنگى ارناسىنا 1 ملرد 356 ملن م3 سۋ جىبەرىلدى. جىل سوڭىنا دەيىن تاعى 44 ملن م3 سۋ جىبەرۋ جوسپارلانىپ وتىر.

2025 جىلعى 27 ناۋرىزدا شۋ وزەنىنىڭ سۋى سوزاق اۋدانىنىڭ جۋانتوبە اۋىلدىق وكرۋگىنە جەتتى. قازىرگى تاڭدا سۋ اۋدان شەكاراسىنان 80 شاقىرىم ىشكە قاراي تارالىپ جاتىر.

بەينەجازبادا كورسەتىلگەن بوگەت, مويىنقۇم اۋىلدىق وكرۋگىنىڭ تۇسىندا 1970 جىلدارى سالىنعان جانە ونى سۋ شايىپ كەتپەس ءۇشىن جەرگىلىكتى اكىمدىك جىل سايىن نىعايتۋ جۇمىستارىن جۇرگىزەدى. راداي وزەگى بويىنداعى بوگەت شۋ وزەنىنىڭ سۋىن سوزاق اۋدانىنا جىبەرۋ جانە 10 مىڭعا جۋىق تۇرعىنى بار كومسومول جانە مويىنقۇم ەلدى مەكەندەرىنىڭ تۇرعىندارى مەن شارۋا قوجالىقتارىن سۋ شايىپ كەتۋ قاۋىپىنەن ساقتاۋ ماقساتىندا بوي كوتەرگەن.

شۋ وزەڭىنىڭ اعىسىن رەتتەۋ جانە بوگەتتىڭ بۇزىلۋىنىڭ الدىن الۋ ءۇشىن راداي وزەگىنىڭ باسىنا سۋ رەتتەگىش قۇرىلعى ورناتۋ تۋرالى شەشىم قابىلداندى. بۇل قۇرىلعى سۋدىڭ تابيعي اعىسىن كەزەڭ-كەزەڭىمەن, قاۋىپسىز جانە ءتيىمدى باسقارۋعا, سۋدى شۋ وزەڭىنىڭ نەگىزگى ارناسىمەن جىبەرۋ جانە سوزاق اۋدانىنا سۋدى جەتكىزۋ ۋاقىتىن ازايتۋعا باعىتتالعان. قازىرگى ۋاقىتتا, جەرگىلىكتى اكىمدىك جوبالىق-سمەتالىق قۇجاتتاماسىن ازىرلەپ جاتىر.

ايتا كەتۋ كەرەك, اۋدان اكىمدىگىنىڭ مالىمەتى بويىنشا شۋ وزەنىنىڭ بويىنداعى مويىنقۇم اۋدانى اۋماعىندا 68 شاعىن شارۋا قوجالىعى جانە جالپى سانى 7500 ءىرى قارا مالى بار ەكى ءىرى جشس بار.

سۋ رەسۋرستارى جانە يرريگاتسيا مينيسترلىگى شۋ وزەڭىنىڭ بويىندا ورنالاسقان اۋداندارعا تۇراقتى تۇردە سۋ جەتكىزۋدى باستى مىندەتتەردىڭ ءبىرى دەپ سانايدى. وسىعان وراي, شۋ وزەنىڭ الداعى جىلدا سۋمەن قامتاماسىز ەتۋ ءۇشىن تاسوتكەل سۋ قويماسىنا 470 ملن م³ سۋ جيناۋ جوسپارلانىپ وتىر.

ايتا كەتۋ كەرەك, وزەن بويىندا 500 سۋ سورعى بار, زاڭسىز قويىلعان 17 سۋ سورعىسى انىقتالىپ, ايىپپۇل سالىندى.