“شۇكىر! شىعار بيىگىنە ابىرويمەن كەلە جاتىر”. ديماش قۇدايبەرگەننىڭ اناسى ۇلى جايلى اسەرلى جازبا جاريالادى

جۋىردا ەلىمىزدىڭ ماقتانىشى, بەلگىلى ءانشى ديماش قۇدايبەرگەنگە قىرعىزستاننىڭ حالىق ءارتىسى اتاعى بەرىلدى. قۋانىشتى جاڭالىقتى سۇيىنشىلەگەن ونەر يەسىنىڭ اناسى سۆەتلانا ايتباەۆا جەلىدە ۇلىنا ارناپ اسەرلى جازبا قالدىردى, دەپ جازدى Qandastar.kz

“ديماشتىڭ «مەيكين ازيا» بايقاۋىنا بارعان كەزى ءالى ەسىمدە. “ىستىقكولدىڭ اۋا-رايىنا ۇيرەنسىن, جولدان شارشاعانى باسىلىپ , كۇش جيناپ , دەمالسىن” دەپ ءبىر اپتا بۇرىن ءۇش بالانى الى , چولپون اتاعا كەلىپ الدىق. ىستىقكولدىڭ سۋىنا شومىلىپ, ءدامى بالداي الماسىن جەپ , سۇلۋ تابيعاتىنىڭ اياسىندا كەرەمەت دەمالدىق. ديماشتى قولداپ بىزبەن بىرگە سول كەزدەگى “ازيا داۋىسى” فەستيۆالىنىڭ پروديۋسسەرلەرى مۇرات يرگاليەۆ پەن الەكساندر پونوماريوۆ تە كەلگەن ەدى. (وكىنىشكە وراي ەكەۋى دە پاندەميا كەزىندە قايتىس بولىپ كەتتى.) سول بايقاۋدا ديماش جەڭىسكە جەتتى, قىرعىز ەلىنىڭ وسى ءبىر جۇلدەسى بار جەڭىستىڭ باستاۋى بولدى. سودان بەرى 12 جىل ءوتىپتى…

ون ەكى جىلدىڭ ىشىندە شۇكىر, ەل قاجەتىنە جاراپ, شىعار بيىگىنە ابىرويمەن كەلە جاتىر. اللا تەك عۇمىر بەرگەي دەيمىن. بىرنەشە مەملەكەتتەردە جەكە كونتسەرتتەرىن بەردى, ءوزى قادىر تۇتاتىن dears تىڭدارماندارى  بار. تۋعان ەلىنىڭ قۇرمەتىنە بولەنىپ ‘قازاقستاننىڭ حالىق ءارتىسى’ اتاندى. بۇگىن, مىنە , قىرعىز ەلىنىڭ قوشەمەتىنە بولەنىپ , «قىرعىز رەسپۋبليكاسىنىڭ حالىق ءارتىسى» اتانىپ جاتىر! 

قاشان دا ءبىر-ءبىرىنىڭ جاقسىلىعىنا قۋانىپ, قينالعاندا قولداي بىلگەن , “قىرعىز-قازاق ءبىر تۋعان” دەپ, بايگەگە تۇسكەن جۇيرىگىنىڭ تىلەۋىن بىرگە تىلەگەن , اراسى اجىراماعان اعايىن ەدىك, بۇگىنگى ماراپاتتىڭ ماعىناسى دا ەكى ەلدىڭ دوستىعىنىڭ, بىرلىگىنىڭ بەينەسىن ايقىنداي ءتۇستى دەپ سانايمىن. قىرعىز حالقىنا, مەملەكەت باسشىسى سادىر جاپاروۆ مىرزاعا, قاشان دا مادەنيەت پەن ونەردىڭ, رۋحانياتتىڭ جاناشىرى بولىپ جۇرەتىن سۇلتان راەۆ اعامىزعا, «مەيكين ازيا» بايقاۋىنىڭ ۇيىمداستىرۋ توبىنا, بارشا تىلەكتەس بولعان اعايىنعا زور قۇرمەتىمدى بىلدىرەمىن! بارشاڭىزعا ۇرپاقتارىڭىزدىڭ قىزىق-قۋانىشىنا بولەنە بەرىڭىزدەر دەيمىن!“,- دەپ جازدى سۆەتلانا ايتباەۆا.