جاڭالىقتار
«شۇجىق تسەحىنىڭ جەلدەتكىشىنىڭ توعى اشىق جاتقان»: قىزىلوردادا 11 جاسار ۇلىنان ايىرىلعان انا وقيعاعا كىنالىلەردى جازالاۋدى سۇرادى
فوتو باعدارلاما كادرلارىنان سكرين
قىزىلوردادا توققا ءتۇسىپ كوز جۇمعان 11 جاسار دانيار رۋستام ۇلىنىڭ وتباسى ادىلدىكتى تالاپ ەتىپ وتىر. ايتۋلارىنشا, قازاعا جەلدەتكىش توقتارىن اشىق قالدىرعان كاسىپكەرلەر كىنالى. وقيعا كۇنى دانيار دوسىمەن ويناپ ءجۇرىپ جاسىرىنباق بولىپ, شۇجىق تسەحىنىڭ بۇرىشىنا بارعان. كەيىن ول جەردەن اعاسى ونى ەس-ءتۇسسىز كۇيدە تاپتى. بۇل تۋرالى Stan.kz اقپارات اگەنتتىگى «كورەمىز» باعدارلاماسىنا سىلتەمە جاساپ حابارلايدى.
مارقۇمنىڭ اناسى جانار لاپپاەۆا وقيعانىڭ قالاي بولعانىن بايانداپ بەردى. وقيعا 19 تامىز كۇنى كەشكى ساعات 21:00 شاماسىندا بولعان.
« ۇلىم دوسىمەن ۇيگە ويىننان ورالدى. تاماق ءىشىپ الىپ, «ماما دوسىمدى شىعارىپ سالايىن, قايتىپ كەلەمىن» دەپ شىعىپ كەتتى. كىشكەنتاي بوپەمدى بەسىككە شايقاپ جاتقانىمدا ۇلكەن ۇلىم حابارلاسىپ, «كوشەنىڭ باسىنا قاراي شىعىڭىزشى, دانيار ەس-ءتۇسسىز جاتىر» دەدى. سويتسەك ول دوسىمەن ويناپ ءبىر-ءبىرىن قۋالاپ جۇگىرگەن. بالالار ويناپ ءجۇرىپ دوسى كەتىپ بارا جاتقاندا دانيار ءبىر قۋىسقا تىعىلامىن دەپ سول توقتىڭ جانىنا بارعان. نەگىزى قۇلاپ بارا جاتىپ جەلدەتكىشتىڭ توعىن ۇستاپ قالۋى مۇمكىن. ونىڭ توققا تۇسكەنىن ەشكىم بىلمەگەن. اعاسى بالامدى يىعىنا سالىپ ءۇي جاققا دەيىن كوتەرىپ كەلگەن. سول كەزدە ول قۇسىپتى. سوسىن دوسى كومەكتەسىپ جاتقاندا بالام كىشى دارەتىن جىبەرىپ قويىپتى. سول كەزدە قورىلدادى دەيدى. جولدىڭ جيەگىنە قويىپ قويعان. باسى بۇرىلىپ جاتى», – دەدى جانار.
جانار حاباردى ەستي سالا بىردەن كوشەگە شىققان.
«جۇگىرىپ كەلسەم ءدال سول جەردە بالام ەس-ءتۇسسىز جاتىر. دانيار دەپ بەتىن ۇرسام, قوزعالمايدى. ءبىر جانىنان جاتىر. جەدەل-جاردەم شاقىرىپ, حابارلاسىپ, كومەك سۇراپ ەدىم, «بريگادا بوس ەمەس, بوساعان كەزدە بارادى» دەدى. كەيىن ءوتىپ بارا جاتقان ءبىر ايەل بالانى ۇستاپ كورىپ, «پۋلسى تومەن, جۇرەك سوعىسى السىرەپ بارادى, كومەكتەسەيىك» دەدى. ءسويتىپ كولىگىنە بالامدى وتىرعىزدى. ءسويتىپ ونى بالالار اۋرۋحاناسىنا الىپ كەتتىك. اۋرۋحانادا ونى بىردەن ىشكە الىپ كەتتى. ەسىكتەرىنەن قاراپ ەدىم, توقپەن جۇرەگىن ۇرىپ جاتىر ەكەن. كەيىن بىردەن جان ساقتاۋ بولىمىنە جاتقىزدى. سودان 5 كۇن جاتتى. 5 كۇننەن كەيىن كوز جۇمدى», – دەپ قوستى اناسى.
دانياردىڭ ويناپ جۇرگەنىن اعاسى كورگەن, كەش بولعاسىن ءىنىسىن الىپ قايتۋ ءۇشىن ولاردىڭ ارتتارىنان جۇرگەن ەكەن. الايدا كەيىن قۋىستان ەس-ءتۇسسىز جاتقان ءىنىسىن الىپ شىققان.
«بالانىڭ ىشىندەگى ەڭ ءبىر اقىلدىسى ەدى. ول ەرەكشە بالا بولدى. جاسىم 75-تە, اياعىم اۋىرىپ تۇرا الماي جاتسام, جۇگىرىپ ءوزى تۇرعىزىپ جىبەرەتىن. ءبىر نارسەنى سۇراۋسىز المايتىن. ارقاشان ءبىرىنشى «اجە الۋعا بولا ما» دەپ سۇرايتىن. 1,5 كەلى بولىپ تۋىلعان بالا ەدى», – دەدى اجەسى.
دانيار 8-مەكتەپ ينتەرناتىنىڭ 4-سىنىبىنا اياق باسۋى كەرەك بولعان. الايدا وقۋ جىلىنا 10 كۇن قالعاندا توققا ءتۇسىپ كوز جۇمدى. ۇستازىنىڭ ايتۋىنشا ول مۇندا 1-سىنىپتان بەرى وقيدى. ول دوستارىمەن تەز ءتىل تابىساتىن, باۋىرمال, ساباقتان سەبەپسىز قالمايتىن, ءبىلىمى ورتاشا دەڭگەيدەگى وقۋشى بولعان.
جەكەمەنشىك مەكەمە جەلدەتكىشتىڭ توعىنا وقيعادان كەيىن ارادا 10-15 كۇننەن كەيىن عانا قورشاۋ سالعان.
“بالانىڭ سول قولىندا, سول الاقانىندا كۇيىك جاراقاتتارىنىڭ ىزدەرى بولۋىنا بايلانىستى ەلەتروجاراقات دەگەن دياگنوز قويىلدى. وعان رەانيماتسيالىق ءىس-شارالار 5 كۇن بويى جۇرگىزىلگەنننەن كەيىن 24 كۇنى كەشكى ساعات 18:00-دە جۇرەگىنىڭ توقتاۋى بايقالىپ, بالا كوز جۇمدى. العاش كەلگەن كەزدە ول كلينيكالىق ولىممەن كەلگەن. كوما جاعدايىندا ەس-ءتۇسسىز, تىنىس المادى. دارىگەرلەر كومەگىنەن كەيىن عانا جۇرەگى قايتا سوعىپ بالانى دەرەۋ جان ساقتاۋ بولىمىنە اپارىپ اپپاراتقا قوستىق”, – دەدى قىزىلوردا قالاسىنىڭ بالالار اۋرۋحاناسى.
اشىق تۇرعان ەلەكتر كوزى شۇجىق ونىمدەرىن دايارلايتىن تسەحقا تيەسىلى. تسەح باسشىسى ۆاستيلي لۋگاي ەسىمدى ازامات. ول – قىزىلورداداعى ءىرى كاسىپكەرلەردىڭ ءبىرى. قول استىنداعى قىزمەتكەرلەرىنىڭ ايتۋىنشا, ول تسەحتان باسقا مەيرامحانا ءىسىن دە جۇرگىزەدى. الايدا تسەح باسشىسى ءوزىنىڭ بۇل عيماراتتى تەك جالعا الىپ وتىرعانىن ايتتى.
“جەلدەتكىش عيماراتتىڭ ىشكى جاعىندا ورنالاسقان جانە بۇل جەكە مەنشىك مەكەمە. قالاداعىلاردى كورسەڭىز, ەشبىر جەلدەتكىش قويىلعان جەرلەر قورشالمايدى. ودان كەيىن نەگە بۇل سۇراقتى ماعان قويىپ وتىرسىزدار? بۇل عيمارات تا, جەلدەتكىش تە مەنىكى ەمەس, مەن تەك جالعا الۋشىمىن”, – دەدى ول.
توتەنشە جاعدايلار دەپارتامەنتى قۇجاتتار زەردەلەنگەننەن كەيىن بارىپ ادام ولىمىنە قاتىستى ىسكە بايلانىستى تەكسەرىس جۇرگىزىلەتىنىن ايتتى.
ال مارقۇمنىڭ اناسى ۇلىنىڭ ولىمىنە كىنالىلەردىڭ جاۋاپكەرشىلىككە تارتىلۋىن تالاپ ەتىپ جاتىر.
