Shydamymyz bitti! — Tramp sumdyq tapsyrma berdi

AQSh prezıdenti Donald Tramp 1963 jyly jabylǵan Kalıfornııadaǵy “Alkatras” túrmesin qaıta ashý týraly buıryq berdi, dep habarlaıdy qandastar.kz saıty.

Tramptyń aıtýynsha, ol túrmeni qaıta ashý jóninde AQSh túrmeler bıýrosyna, Ádilet mınıstrligine, Ishki qaýipsizdik mınıstrligine jáne FBR-ǵa tapsyrma bergen.

Prezıdenttiń aıtýynsha, AQSh budan bylaı “óz jumysyn oryndaýdan qorqatyn, elge zańsyz kelgen qylmyskerlerdi elden shyǵarýǵa múmkindik bermeıtin sýdıalardyń tutqynynda bola almaıdy”.

Onyń pikirinshe, túrmeniń qaıta ashylýy — “zańnyń, tártiptiń jáne ádildiktiń sımvolyna” aınalady.

“Biz endi kóshelerimizde zulymdyq, qan tógis pen búlik taratatyn qylmyskerlerdi, serııalyq qylmyskerlerdi tóze almaımyz. Sondyqtan búgin men AQSh túrmeler bıýrosyna, Ádilet mınıstrligine, FBR men Ishki qaýipsizdik mınıstrligine birlese otyryp, eń qatygez ári meıirimsiz qylmyskerlerdi ustaýǵa arnalǵan keńeıtilgen ári qaıta salynǵan “Alkatras” túrmesin ashýdy tapsyramyn. Biz endi qylmyskerlerdiń, bandıtterdiń jáne óz jumysyn atqarýǵa qorqatyn sýdıalardyń tutqynynda bola almaımyz. Alkatrastyń qaıta ashylýy — zańnyń, tártiptiń jáne ádildiktiń sımvolyna aınalady”, — dep jazdy AQSh prezıdenti Truth Social platformasynda.

Qatań rejımdegi burynǵy federaldy túrme — “Alkatras” San-Franısko shyǵanaǵyndaǵy aralda ornalasqan. Ol eski forttyń ornyna 1912 jyly salynǵan jáne alǵashynda áskerı túrme retinde qoldanylǵan.

Alaıda 1936 jyly Ádilet mınıstrliginiń qaramaǵyna berilip, qaıta jóndelip, qaýipsizdigi kúsheıtilgen. Bul túrmege eń qaýipti qylmyskerler qamalǵan. Mysaly, ataqty gangster Al Kapone osy túrmede otyrǵan.

“Alkatras” AQSh-taǵy eń qatań túrme sanalǵan. Burynǵy tutqyndar túrme kúzetshileriniń qataldyǵy men adam tózgisiz jaǵdaılar týraly jıi aıtatyn. Túrme jumys istegen jyldary “Skala” atalyp ketken bul túrmeden 14 ret qashýǵa áreket jasalǵan, biraq eshqaısysy sátti bolmaǵan.

1963 jyly túrme jabylyp, sodan beri týrıster kóp keletin mýzeı retinde jumys istep kelgen.