شىعىن 1,2 ميلليارد تەڭگە: ەلىمىزدە الەۋمەتتىك تولەمدەر ارقىلى الاياقتىق جاساعان شەنەۋنىكتەر مەن ەسەپشىلەر ۇستالدى

فوتو: gov.kz

2024-2025 جىلدارى قازاقستاندا 1,2 ميلليارد تەڭگەنىڭ الەۋمەتتىك تولەمدەرىن ۇرلاۋ فاكتىلەرى انىقتالعان, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

قارجىلىق مونيتورينگ اگەنتتىگىنىڭ مالىمەتىنشە, 2024–2025 جىلدارى مەملەكەتكە جۇكتىلىك پەن بوسانۋ بويىنشا جاردەماقىلار جانە اتاۋلى الەۋمەتتىك كومەك تۇرىندەگى الەۋمەتتىك تولەمدەردى زاڭسىز تاعايىنداۋ فاكتىلەرى بويىنشا جالپى سوماسى 1,2 ميلليارد تەڭگە زالال كەلتىرىلگەن. وسىلايشا 13 سوتقا دەيىنگى تەرگەۋ ءىسى جۇرگىزىلىپتى.

جۇكتىلىك پەن بوسانۋ بويىنشا زاڭسىز تولەمدەرگە قاتىستى 10 قىلمىستىق ءىس قوزعالىپ, 15 ۇيىمداستىرۋشى جاۋاپكەرشىلىككە تارتىلدى.

اگەنتتىك دەرەگىنشە, جالعان جۇمىسپەن قامتۋ ارقىلى 385 ايەل وتىرىك دەرەكتەر نەگىزىندە جاردەماقى العان. بۇل مەملەكەتكە 1 ميلليارد تەڭگە كولەمىندە زالال كەلتىرگەن. ماسەلەن, اقتوبە وبلىسىندا ومىربەكوۆا مەن بايمۇرزاەۆا 70 ايەلدى 29 جەكە كاسىپكەرلىككە جالعان جۇمىسقا ورنالاستىرىپ, 487 ميلليون تەڭگەنى جىمقىرعانى ءۇشىن 6 جىلعا سوتتالدى.

شىمكەنتتە دۇيسەنوۆا ءدال وسىلاي 98 ميلليون تەڭگە شىعىن كەلتىرگەنى ءۇشىن 5 جىلعا باس بوستاندىعىنان ايىرىلدى.

اگەنتتىك مالىمەتىنشە, قىلمىس جاساۋ تەتىگى بارلىق انىقتالعان جاعدايدا بىردەي سيپاتتا بولعان. كۇدىكتىلەر ارنايى قۇرىلعان جەكە كاسىپكەرلىكتەرگە جۇكتى ايەلدەردى جالعان جۇمىسقا قابىلداپ, «ارتقى كۇنمەن» ەڭ جوعارى الەۋمەتتىك جانە زەينەتاقى اۋدارىمدارىن راسىمدەگەن. وسىلايشا, ارتىق مولشەردە جاردەماقى الۋعا نەگىز جاساعان.

اتاۋلى الەۋمەتتىك كومەك قارجىسىن جىمقىرۋ فاكتىلەرى بويىنشا جۇمىسپەن قامتۋ جانە الەۋمەتتىك باعدارلامالار بولىمدەرىنىڭ 15 قىزمەتكەرىنە قاتىستى ءۇش سوتقا دەيىنگى تەرگەۋ باستالدى.

ۆەدومستۆونىڭ حابارلاۋىنشا, بۇل سحەمادا باس بۋحگالتەر اتاۋلى الەۋمەتتىك كومەكتى الۋشىلار تىزىمىنە شىن مانىندە ۋاكىلەتتى توپقا كىرمەيتىن سەنىمدى ادامداردى قوسقان. سول دەرەكتەر نەگىزىندە تولەم تاپسىرمالارى دايىندالىپ, باسشىلىق قول قويعان. كەيىن اقشا جالعان تۇلعالاردىڭ ەسەپشوتتارىنا اۋدارىلىپ, قولما-قول الىنىپ, قاتىسۋشىلار اراسىندا بولىنگەن.

سونىمەن قاتار اگەنتتىك 2023 جىلدان باستاپ قۇجاتتاردى eGov پورتالى ارقىلى تسيفرلاندىرۋدىڭ ارقاسىندا مۇنداي الاياقتىق ارەكەتتەرگە جول بەرىلمەيتىنىن ءايتتى

«انىقتالعان زاڭبۇزۋشىلىقتاردى, قىلمىستاردىڭ جاسالۋىنا ىقپال ەتكەن سەبەپتەر مەن جاعدايلاردى جويۋ ماقساتىندا اگەنتتىك ەڭبەك جانە حالىقتى الەۋمەتتىك قورعاۋ مينيسترلىگىنە ءتيىستى ۇسىنىستار ەنگىزدى. اتاپ ايتقاندا, قولدانىستاعى ەرەجەلەرگە وزگەرىستەر ەنگىزىلدى: ەندى جاردەماقى تاعايىنداۋ كەزىندە «ارتقى كۇنمەن» تولەنگەن زەينەتاقى جارنالارى ەسەپكە الىنبايدى», – دەدى اگەنتتىك.