Shyǵyn 1,2 mıllıard teńge: Elimizde áleýmettik tólemder arqyly alaıaqtyq jasaǵan sheneýnikter men esepshiler ustaldy

Foto: gov.kz

2024-2025 jyldary Qazaqstanda 1,2 mıllıard teńgeniń áleýmettik tólemderin urlaý faktileri anyqtalǵan, dep jazdy qandastar.kz

Bul týraly Stan.kz aqparat agenttigi habarlaıdy.

Qarjylyq monıtorıng agenttiginiń málimetinshe, 2024–2025 jyldary memleketke júktilik pen bosaný boıynsha járdemaqylar jáne ataýly áleýmettik kómek túrindegi áleýmettik tólemderdi zańsyz taǵaıyndaý faktileri boıynsha jalpy somasy 1,2 mıllıard teńge zalal keltirilgen. Osylaısha 13 sotqa deıingi tergeý isi júrgizilipti.

Júktilik pen bosaný boıynsha zańsyz tólemderge qatysty 10 qylmystyq is qozǵalyp, 15 uıymdastyrýshy jaýapkershilikke tartyldy.

Agenttik dereginshe, jalǵan jumyspen qamtý arqyly 385 áıel ótirik derekter negizinde járdemaqy alǵan. Bul memleketke 1 mıllıard teńge kóleminde zalal keltirgen. Máselen, Aqtóbe oblysynda О́mirbekova men Baımurzaeva 70 áıeldi 29 jeke kásipkerlikke jalǵan jumysqa ornalastyryp, 487 mıllıon teńgeni jymqyrǵany úshin 6 jylǵa sottaldy.

Shymkentte Dúısenova dál osylaı 98 mıllıon teńge shyǵyn keltirgeni úshin 5 jylǵa bas bostandyǵynan aıyryldy.

Agenttik málimetinshe, qylmys jasaý tetigi barlyq anyqtalǵan jaǵdaıda birdeı sıpatta bolǵan. Kúdiktiler arnaıy qurylǵan jeke kásipkerlikterge júkti áıelderdi jalǵan jumysqa qabyldap, «artqy kúnmen» eń joǵary áleýmettik jáne zeınetaqy aýdarymdaryn rásimdegen. Osylaısha, artyq mólsherde járdemaqy alýǵa negiz jasaǵan.

Ataýly áleýmettik kómek qarjysyn jymqyrý faktileri boıynsha jumyspen qamtý jáne áleýmettik baǵdarlamalar bólimderiniń 15 qyzmetkerine qatysty úsh sotqa deıingi tergeý bastaldy.

Vedomstvonyń habarlaýynsha, bul shemada bas býhgalter ataýly áleýmettik kómekti alýshylar tizimine shyn máninde ýákiletti topqa kirmeıtin senimdi adamdardy qosqan. Sol derekter negizinde tólem tapsyrmalary daıyndalyp, basshylyq qol qoıǵan. Keıin aqsha jalǵan tulǵalardyń esepshottaryna aýdarylyp, qolma-qol alynyp, qatysýshylar arasynda bólingen.

Sonymen qatar agenttik 2023 jyldan bastap qujattardy eGov portaly arqyly ıfrlandyrýdyń arqasynda mundaı alaıaqtyq áreketterge jol berilmeıtinin aıtti

«Anyqtalǵan zańbuzýshylyqtardy, qylmystardyń jasalýyna yqpal etken sebepter men jaǵdaılardy joıý maqsatynda Agenttik Eńbek jáne halyqty áleýmettik qorǵaý mınıstrligine tıisti usynystar engizdi. Atap aıtqanda, qoldanystaǵy erejelerge ózgerister engizildi: endi járdemaqy taǵaıyndaý kezinde «artqy kúnmen» tólengen zeınetaqy jarnalary esepke alynbaıdy», – dedi agenttik.