شىعىس قازاقستاندا دەپۋتات ءوز وزىنە قول جۇمساماق بولدى

شىعىس قازاقستان وبلىسى تارباعاتاي اۋدانىندا دەپۋتات ءوز وزىنە قول جۇمساماق بولدى, دەپ حابارلايدى qandastar.kz  اقپارات پورتالى Kazinform اگەنتتىگىنە سىلتەمە جاساپ.

كەشەلى بەرى الەۋمەتتىك جەلىدە تارباعاتاي اۋداندىق ءماسليحاتىنىڭ دەپۋتاتى س. دەمەسىنوۆتىڭ ءوز وزىنە قول جۇمساماق بولعانى, اۋرۋحاناعا ءتۇسىپ, امان قالعانى تۋرالى اقپارات تاراپ كەتتى.

— اۋداندىق ماسليحات دەپۋتاتى س. دەمەسىنوۆ 19 اقپان كۇنى ءوز-وزىنە قول جۇمساماق نيەتتە ءدارى-دارمەك ءىشىپ اۋرۋحاناعا تۇسكەنى انىقتالدى. اۋرۋحانادا دەنساۋلىعىنا قاۋىپتى جاعداي بولماعاندىقتان, پسيحياتر دارىگەردىڭ قابىلداۋىنان كەيىن ۇيىنە قايتارىلعان, — دەپ جاۋاپ بەردى اكىمدىكتەن.

بەلگىلى بولعانداي, ول 2023 جىلدىڭ ناۋرىز ايىندا قاراسۋ اۋىلدىق وكرۋگى بويىنشا دەپۋتات بولىپ سايلانعان. وتكەن جىلدىڭ جەلتوقسان ايىندا ماس كۇيدە كولىك جۇرگىزگەنى ءۇشىن اكىمشىلىك جاۋاپكەرشىلىككە تارتىلىپ, 17 كۇنگە اكىمشىلىك قاماققا الىنعان.

— سونىمەن قاتار دارىگەرلەرگە تەكسەرۋ كەزىندە بالاعات سوزدەر ايتقان بەينەجازباسى باق-تا, الەۋمەتتىك جەلىلەردە جاريالانعان بولاتىن. جەرگىلىكتى اتقارۋشى بيلىك ورگاندارى تاراپىنان س. دەمەسىنوۆكە ءوز-وزىنە قول جۇمساۋ ارەكەتىنە دەيىن يتەرمەلەيتىندەي سەبەپتەر, كيكىلجىڭدەر, قىزمەتكەرلەرمەن جەكە باس ارىزدىق جاعدايلار بولعان جوق, — دەلىنگەن حابارلامادا.

وسى رەتتە, وبلىستىق پوليتسيا دەپارتامەنتىمەن بايلانىسقا شىعىپ, اتالعان فاكتى بويىنشا ءىس قوزعالعان-قوزعالماعانىن سۇرادىق.

— پوليتسيا ءوز-وزىنە قول جۇمساۋ فاكتىسى بويىنشا قىلمىستىق ءىس قوزعادى. وقيعانىڭ ءمان-جايى مەن سەبەپتەرىن انىقتاۋعا باعىتتالعان تەرگەۋ جۇمىستارى جۇرگىزىلۋدە, — دەپ حابارلادى دەپارتامەنتتىڭ ءباسپاسوز قىزمەتىنەن.

رەداكتسيا س. دەمەسىنوۆتىڭ وزىنە دە حابارلاسىپ كوردى. الايدا ول تەلەفونىن كوتەرمەدى. ال تارباعاتاي اۋداندىق ءماسليحاتىنىڭ باسقا دەپۋتاتتارى سۇراقتارىمىزعا جاۋاپ بەرۋدەن باس تارتتى.