شىمكەنت اكىمدىگى «ورداباسى» كلۋبى مەن قوسالقى كوماندالارىنا تاعى 900 ملن ءبولىپ وتىر

فوتو: اشىق دەرەككوز

شىمكەنت قالالىق دەنە شىنىقتىرۋ جانە سپورت ءبولىمى فۋتبولدان كەزەكتى تەندەر جاريالادى, دەپ حابارلادى Qandastar.kz.

تەندەر سوماسى – 892,9 ملن تەڭگە. «فۋتبول كوماندالارىن دايىنداۋ, ولاردىڭ جەرگىلىكتى, رەسپۋبليكالىق جانە حالىقارالىق جارىستارعا قاتىسۋىن قامتاماسىز ەتۋ قىزمەتتەرىن» ورىنداۋ مەرزىمى – 2024 جىلدىڭ 31 جەلتوقسانىنا دەيىن.

تەحنيكالىق سيپاتتامادا كورسەتىلگەندەي, تەندەردىڭ نەگىزگى ماقساتى – شىمكەنت قالاسى كوماندالارىنىڭ 2024 جىلعى ماۋسىمدا قازاقستان پرەمەر-ليگاسى, قازاقستان ەكىنشى ليگاسى چەمپيوناتتارىندا, ۋەفا كۋبوكتارىندا, قازاقستان چەمپيوناتىندا بالالار مەن جاسوسپىرىمدەر كوماندالارى اراسىنداعى جانە حالىقارالىق تۋرنيرلەردە, سونداي-اق فۋتزالدان 2024-2025 جىلعى ماۋسىمدا قازاقستان چەمپيوناتىندا ءساتتى ونەر كورسەتۋى ءۇشىن جاعداي جاساۋ.

قازاقستان فۋتبولىنىڭ ەليتاسىندا شىمكەنتتەن تەك ءبىر عانا كوماندا – «ورداباسى» كلۋبى ونەر كورسەتەدى. ءبىر قىزىعى, ەل چەمپيوناتىندا ولاردىڭ وتكىزەتىن بار بولعانى ەكى-اق ويىنى قالدى. وسىدان كەيىن ماۋسىمارالىق ءۇزىلىس باستالادى. رەسمي حالىقارالىق كەزدەسۋ وتكىزۋ دە قاراستىرىلماعان.

دەگەنمەن, تەحنيكالىق سيپاتتامادا اقىلعا قونبايتىن ەسكەرتۋلەر ەنگىزىلگەن. مىسالى, بولىنگەن قارجىنى اكىمشىلىك جانە جاتتىقتىرۋشى پەرسونالدى, كاسىبي فۋتبولشىلاردى ۇستاۋعا (جالاقى تولەۋ, جاردەماقى, سپورتتىق, جاتتىقتىرۋشىلىق جانە اكىمشىلىك پەرسونالدىڭ ءىسساپار شىعىندارى, تورەشىلەر قۇرامىنىڭ شىعىندارى جانە سالىق تولەۋ, قازاقستان فۋتبول فەدەراتسياسى, ۋەفا, فيفا جانە باسقا دا ۋاكىلەتتى ورگاندار تاراپىنان سالىنعان ايىپپۇلداردى تولەۋ بويىنشا شىعىندار), قازاقستان پرەمەر-ليگاسىندا كوماندالاردىڭ ءساتتى ونەر كورسەتۋى ءۇشىن كاسىبي فۋتبولشىلارعا, جاتتىقتىرۋشىلار قۇرامىنا, اكىمشىلىك-باسقارۋ پەرسونالىنا ىنتالاندىرۋ سىياقىلارىن تولەۋ قاجەت.

Adata.kz اقپاراتىنا سۇيەنسەك, بيىل «ورداباسى كاسىپقوي فۋتبول كلۋبى» اق شىمكەنت قالاسىنىڭ دەنە شىنىقتىرۋ جانە سپورت باسقارماسىمەن جالپى سوماسى 5,3 ملرد تەڭگەنى قۇرايتىن 5 كەلىسىمشارت جاساستى. بۇل بيىلعى ماۋسىمدا قالانىڭ سپورت قاجەتتىلىكتەرىنە جۇمسالعان بارلىق بيۋدجەت قاراجاتىنىڭ 87,1 پايىزىن قۇرايدى.

«ورداباسى كاسىپقوي فۋتبول كلۋبىنىڭ» 2024 جىلى جەڭىپ العان تەندەرلەر ءتىزىمى تومەندەگىدەي:

1 ملرد تەڭگە – فۋتبول كوماندالارىن دايىنداۋ جانە ولاردىڭ جەرگىلىكتى, رەسپۋبليكالىق جانە حالىقارالىق جارىستارعا قاتىسۋىن قامتاماسىز ەتۋ قىزمەتتەرى.

1,2 ملرد تەڭگە – شىمكەنت قالاسىنىڭ نەگىزگى فۋتبول قۇرامىن دايىنداۋ جانە ولاردىڭ 2024 جىلعى ۋەفا ەۋروپا ليگاسى مەن ۋەفا كونفەرەنتسيالار ليگاسىنا قاتىسۋىن قامتاماسىز ەتۋ قىزمەتتەرى.

1,2 ملرد تەڭگە – فۋتبول كوماندالارىن دايىنداۋ جانە ولاردىڭ جەرگىلىكتى, رەسپۋبليكالىق جانە حالىقارالىق جارىستارعا قاتىسۋىن قامتاماسىز ەتۋ قىزمەتتەرى.

1,2 ملرد تەڭگە – فۋتبول كوماندالارىن دايىنداۋ جانە ولاردىڭ جەرگىلىكتى, رەسپۋبليكالىق جارىستارعا قاتىسۋىن قامتاماسىز ەتۋ قىزمەتتەرى.

700 ملن تەڭگە – شىمكەنت قالاسىنىڭ فۋتزال كوماندالارىن دايىنداۋ جانە ولاردىڭ جەرگىلىكتى, رەسپۋبليكالىق جانە حالىقارالىق جارىستارعا قاتىسۋىن قامتاماسىز ەتۋ قىزمەتتەرى.