شىمكەنت اكىمىنىڭ ورىنباسارىنا قاستاندىق جاساۋ ءىسى: كۋاگەر جيەمبايدى جۇمىستان شىعارماق بولعانىن راستادى

فوتو: الەۋمەتتىك جەلىدەن

شىمكەنت اكىمىنىڭ ورىنباسارى رۋسلان بەردەنوۆكە قاستاندىق جاساۋ ءىسى بويىنشا سوت وتىرىسىندا كۋاگەرگەرلەردىڭ ءبىرى ەرنار جيەمبايدى جۇمىستان بوساتۋدى جوسپارلاعانىن راستادى, دەپ جازدى qandastar.kz.

بۇل تۋرالى Stan.kz اقپارات اگەنتتىگى حابارلايدى.

شىمكەنتتەگى سوتتا كۋاگەرلەردى سۇراۋ باستالدى. العاشقى بولىپ قۇرىلىس باسقارماسى قۇرىلىس نىساندارىن باقىلاۋ ءبولىمىنىڭ باسشىسى امانعالي كەنجەبەكوۆ تۇسىنىكتەمە بەردى.

ونىڭ ايتۋىنشا, 21 ءساۋىر كۇنى باسقارما باسشىسىنىڭ ورىنباسارى اجيباەۆ قوڭىراۋ شالىپ, جيەمبايدىڭ جۇمىستان شىعۋ تۋرالى ءوتىنىش جازعان-جازباعانىن انىقتاپ بەرۋدى سۇراعان. سول كەزدە جيەمباي «تۇرعىن ءۇي شىمكەنت» جشس ديرەكتورى قىزمەتىن اتقارعان. قوڭىراۋدان كەيىن كەنجەبەكوۆ ءمان-جايدى ءبىلۋ ءۇشىن جيەمبايمەن حابارلاسقان.

«ەرنار «نەگە بۇلاي ىستەيدى, وعان ءبىر اي ۋاقىت بەرگەن جوق پا?»  دەپ جاۋاپ بەردى. بۇعان دەيىن مەن جيەمبايدىڭ تاراپىنان ەشقانداي ءتارتىپ بۇزۋ نەمەسە زاڭسىز ارەكەت بايقامادىم», – دەدى كەنجەبەكوۆ.

كۋاگەردىڭ ايتۋىنشا, جيەمبايدى تاعايىنداۋ نەمەسە قىزمەتتەن بوساتۋ باسقارما باسشىسىنىڭ قۇزىرەتىندە, ال بەردەنوۆ ونى قىزمەتتەن الا المايدى.

وتكەن سوت وتىرىسىندا ايىپتالۋشى ەرنار جيەمباي جابىرلەنۋشىنى تەك قورقىتپاق بولعانىن ايتقان ەدى. ول ولاردىڭ اراسىنداعى جانجال بەردەنوۆتىڭ ونىڭ جارىنا قاتىستى ارەكەتتەرىنەن تۋىنداعانىن مالىمدەدى. جيەمبايدىڭ سوزىنشە, شەنەۋنىك ءوز قىزمەتتىك وكىلەتىن پايدالانىپ, ءوزىن «قاماتامىن» دەپ قورقىتقان. سونداي-اق ايىپتالۋشى جابىرلەنۋشى ودان شىمكەنت اكىمى عابيت سىزدىقبەكوۆكە جالا جابۋدى تالاپ ەتكەنىن جەتكىزدى.

ەسكە سالايىق, بەردەنوۆكە قاستاندىق 21 ءساۋىر كەشكە جاسالعان ەدى. شەنەۋنىك وق جاراقاتىمەن اۋرۋحاناعا ءتۇستى. الدىن الا مالىمەت بويىنشا وعان وق اتقان ادام شىمكەنت اكىمدىگىنە قاراستى سەرىكتەستىك قىزمەتكەرى. قىلمىستىق ءىس قوزعالىپ, كۇدىكتى ۇستالعان. العاشقىدا بۇل وقيعاعا قىزعانىش نەمەسە ادەپسىز قىلىق سەبەپ بولۋى مۇمكىن دەگەن بولجام ايتىلعان ەدى. الايدا شىمكەنت قالاسىنىڭ ىشكى ساياسات جانە جاستار ىستەرى باسقارماسىنىڭ باسشىسى ايگەرىم جۇماقۇلوۆا بۇل نۇسقانى جوققا شىعارۋعا اسىقتى.

12 مامىردا بەردەنوۆتىڭ ساۋىعىپ, اۋرۋحانادان شىعۋعا دايىندالىپ جاتقانى حابارلانعان. 25 ماۋسىمدا تەرگەۋ ءىسى اياقتالعانى بەلگىلى بولدى. ال 6 تامىز كۇنى سوتتا جيەمباي بۇل ارەكەتكە قىزعانىشپەن بارعانىن مالىمدەدى. وسىلايشا باستاپقىدا تاراعان قىزعانىش نەمەسە ادەپسىز قارىم-قاتىناس ماسەلەسى راس بولۋى مۇمكىن ەكەنىن جاناما تۇردە راستادى.