Shymkent: Esepshi balalarǵa bólingen qomaqty qarjyny jymqyrǵan

Foto: ashyq derekkóz

Shymkent qalasynyń qylmystyq ister jónindegi aýdanaralyq soty qaladaǵy bir mekteptiń bas esepshisine qatysty úkim shyǵardy. Ol Qylmystyq kodekstiń 189-baby 4-bóligi 2-tarmaǵy («Memleketke senip tapsyrylǵan asa iri mólsherdegi múlikti jymqyrý») jáne 218-baby 3-bóligi 3-tarmaǵy («Qylmystyq jolmen alynǵan iri mólsherdegi aqshany nemese ózge múlikti zańdastyrý») boıynsha kináli dep tanylyp, 8 jylǵa bas bostandyǵynan aıyryldy, dep habarlaıdy qandastar.kz

Sot materıaldaryna sáıkes, aıyptalýshy qyzmet babyn paıdalanyp, memleketke 451,1 mıllıon teńge kóleminde materıaldyq zalal keltirgen. Ol bul qarajatqa birneshe páter, avtokólik, jer telimi men baǵaly qaǵazdar satyp alǵan.

Sottalýshy óz kinásin tolyq moıyndady. Úkim ázirge zańdy kúshine engen joq.