جاڭالىقتار
شىمكەنتتە ايەل ادامنىڭ جۇرەگى اۋىستىرىلدى
شىمكەنتتە كارديوحيرۋرگتار قايتىس بولعان تاراز تۇرعىنىنىڭ جۇرەگىن مۇعالىم كەلىنشەككە سالدى, دەپ حابارلايدى Qandastar.kz اقپارات پورتالى.
بۇل — جۇرەك ترانسپلانتاتسياسى بويىنشا ءۇشىنشى وپەراتسيا.
دونورلىق جۇرەك تاراز قالاسىنان ءبىر جارىم ساعاتتان از ۋاقىت ىشىندە جەدەل جەتكىزىلدى. ال جۇرەگى اۋىستىرىلعان 41 جاستاعى كەلىنشەك شىمكەنت قالاسىنىڭ تۇرعىنى. ول 2012 جىلدان بەرى جۇرەك جەتكىلىكسىزدىگىنىڭ اۋىر تۇرىمەن اۋىرعان.
«دونورلىق ورگاندى الۋ, ونى تاسىمالداۋ جانە وپەراتسيانىڭ ءوزى مەديتسينالىق جانە ەتيكالىق ستاندارتتارعا تولىقتاي ساي جۇرگىزىلدى», — دەدى مينيسترلىك.
كۇردەلى حيرۋرگيالىق ارالاسۋ شىمكەنت قالاسىنىڭ دەنساۋلىق ساقتاۋ باسقارماسىنىڭ ۇيىمداستىرۋىمەن, جوعارى بىلىكتى كارديوحيرۋرگ دارحان سۇيگەنباەۆتىڭ جەتەكشىلىگىمەن, تاراز قالاسىنان كەلگەن ارىپتەستەر, UMC كومانداسى جانە بارلىق قاتىسقان مەديتسينا قىزمەتكەرلەرىنىڭ قاتىسۋىمەن ءوتتى. ولاردىڭ ۇيلەسىمدى جانە كاسىبي جۇمىسىنىڭ ارقاسىندا وپەراتسيا ءساتتى اياقتالدى.
