شىمكەنتتە اكەسى ايالدامادا قالدىرعان 13 جاستاعى بالا جوعالىپ كەتكەن

فوتو: otyrar.kz

پوليتسياعا شىمكەنت تۇرعىنى ارىزدانىپ, ايالداماعا ۋاقىتشا قالدىرا تۇرعان 13 جاستاعى ۇلىنىڭ جوعالىپ كەتكەنىن ايتقان. اتالعان حابارلاما بويىنشا سوزاق اۋدانىنىڭ پوليتسياسى بىردەن ارەكەت ەتىپ, بالانى ىزدەۋگە جۇمىلدىرىلدى, دەپ حابارلايدى Qaz365.kz تىلشىسى Otyrar.kz-كە سىلتەمە جاساپ.

تەلەارنانىڭ سايتىندا حابارلانعانداي, ءتارتىپ ساقشىلارى شاعىمدانۋشى اكەسى مەن ۇلىنىڭ وقيعاسىن انىقتاپ الىپ, ولاردىڭ جۇرگەن جولىن تەكسەرگەن. ءدامحانالار مەن ويىن-ساۋىق ورتالىقتارىن دا نازاردان تىس قالدىرماي, قاراپ شىقتى.

وسىلايشا جوسپارلى جۇرگىزىلگەن ىزدەۋ جۇمىستارىنىڭ ناتيجەسىندە كامەلەت جاسىنا تولماعان بالا تاسجولدىڭ بويىنان تابىلدى.

پوليتسەيلەردىڭ انىقتاۋى بويىنشا اكەسى مەن ۇلى شىمكەنت قالاسىنان سوزاق اۋدانىنا كولىكپەن قىدىرىپ كەلە جاتقان كەزدە, ءجاسوسپىرىم بالاسى ءوزىن جايسىز سەزىنەدى. دەنساۋلىعى سىر بەرگەن ۇلىنا ءدارى-دارمەك قاجەت ەكەنىن تۇسىنگەن اكەسى ۇلىن ايالداماعا قالدىرىپ, ءوزى دارىحاناعا بەتتەيدى. الايدا ءدارىنى دەر كەزىندە جەتكىزگەنىمەن, بالاسىن ايالدامادان تاپپاي قالادى.

پوليتسيانىڭ ىزدەۋ جۇمىستارىنىڭ ارقاسىندا بالا وتباسىنا امان-ەسەن تابىستالدى, ال اكەسى ساقشىلارعا شەكسىز العىسىن جەتكىزدى.