شىمكەنتتە التى جاسار جيەنىن اياۋسىز ولتىرگەن ايەلگە قاتىستى تىڭ دەرەك شىقتى

فوتو: ۆيدەو سكرين

شىمكەنتتە التى جاسار جيەنىن ولتىرگەنى ءۇشىن ايىپتالعان ايەل 20 جىلعا باس بوستاندىعىنان ايىرىلدى. سوتتىڭ مالىمەتىنشە, ول قىزدى ۆانناداعى سۋعا باتىرىپ ولتىرگەن, دەپ حابارلايدى qandastar.kz

«تەرگەۋ ماتەريالدارى بويىنشا, 2023 جىلدىڭ ماۋسىم ايىندا ايىپتالۋشى ق. جالعا الىنعان پاتەردە بولعان. ول جيەنى, 2018 جىلى تۋعان ە. ەسىمدى قىز بالانىڭ ويانىپ, جىلاعانىنا اشۋلانىپ, ونىڭ قولى مەن اياعىن بايلاپ, ساباعان. سودان كەيىن بالانىڭ ەسىنەن تانعانىن كورىپ, ۆاننانى تولتىرىپ, ونى سۋعا باتىرىپ جىبەرگەن. وسىلايشا, ول قاساقانا كىسى ءولتىردى دەپ تانىلدى», — دەپ جازىلعان سوت حابارلاماسىندا.

Azattyq Rýhy حابارلاعانداي,   سوتتا ق-نىڭ كىناسى دالەلدەندى. پروكۋرور ايىپتالۋشىعا قىلمىستىق كودەكستىڭ 99-بابىنىڭ 3-ءبولىمى بويىنشا 20 جىلعا باس بوستاندىعىنان ايىرۋدى سۇرادى.

«جابىرلەنۋشى تاراپتىڭ زاڭدى وكىلى كەشىرىم بەرىپ, ق-عا قاتاڭ جازا تاعايىنداماۋدى وتىنگەنىمەن, ايىپتالۋشى ءوز كىناسىن مويىندامادى جانە جەڭىل جازا بەرۋدى سۇرادى», — دەلىنگەن حابارلامادا.

سوت ق-نى كىنالى دەپ تاۋىپ, وعان 20 جىلعا باس بوستاندىعىنان ايىرۋ جازاسىن تاعايىندادى. اتالعان ۇكىم ءالى زاڭدى كۇشىنە ەنگەن جوق.