جاڭالىقتار
شىمكەنتتە بەلگىسىز ەر ادام پوليتسەيدى پىشاقتاپ كەتتى
فوتو ۆيدەوكادردان سكرينشوت جاسالعان
الەۋمەتتىك جەلىدە شىمكەنتتە الدەبىرەۋ ءتارتىپ ساقشىسىنىڭ ارقا تۇسىنا سوققى جاساپ, ونى جارالاعان ۆيدەو تارادى. بۇل تۋرالى Stan.kz اقپارات اگەنتتىگى حابارلايدى.
وقيعا 2024 جىلدىڭ 1 قىركۇيەگىندە بولعان. اقپاراتتى قالالىق پوليتسيا دەپارتامەنتىنىڭ ءباسپاسوز قىزمەتى راستادى.
«اتالعان فاكتى بويىنشا كۇدىكتى ۇستالىپ, ۋاقىتشا ۇستاۋ يزولياتورىنا قامالدى. ىسكە سايكەس قىلمىستىق كودەكسىنىڭ 380-بابى «بيلىك وكىلىن قورقىتۋ نەمەسە كۇش قولدانۋ» بويىنشا قىلمىستىق ءىس قوزعالدى», – دەدى پوليتسيا.
كۇدىكتى 12 جىلعا دەيىن باس بوستاندىعىنان ايىرىلۋى مۇمكىن. شابۋىل جاساعان ەر ادامنىڭ نيەتى بەلگىسىز. جارالانعان پوليتسەي ءتىرى, ونىڭ دەنساۋلىق جاعدايى تۋرالى مالىمەت جوق.
