جاڭالىقتار
شىمكەنتتە «ديكي ارمان» ءىسى بويىنشا التى كۇدىكتىگە ۇكىم شىقتى
شىمكەنت سوتى اتىشۋلى قىلمىس الەمىنىڭ سەركەسى ارمان جۇماگەلديەۆتىڭ سىبايلاستارىنا قاتىستى قىلمىستىق ءىستى قاراۋدى اياقتادى. 6 كۇدىكتىگە “ديكي ارمان” قىلمىستىق توبىنىڭ مۇشەسى دەپ ايىپ تاعىلدى, دەپ حابارلايدى Qandastar.kz اقپارات پورتالى.
سوتتالۋشىلاردىڭ تورتەۋى بىر جىلدان جەتى جىلعا دەيىن سوتتالدى. مىسالى, ارمان سارتاەۆ وز بەتىمەن ارەكەت ەتىپ, زاڭسىز بوستاندىقتان ايىرعانى ءۇشىن تۇرمەدە 5 جىلعا جۋىق جازاسىن وتەيدى.
داۋر تاۋكەۆ بوپسالاپ جانە زاڭسىز قارۋ ساقتاعانى ۇشىن 7 جىلعا باس بوستاندىعىنان ايىرىلدى. ايدار ورازوۆ — قارۋ ساقتاپ, تاسىمالداعانى ءۇشىن 4 جىل, ال عالىم اشىروۆ زاڭسىز بوستاندىقتان ايىرعانى ءۇشىن 1 جىلعا سوتتالدى.
توپتىڭ تاعى ءبىر مۇشەسى — داۋلەت ورازباي 1 جىل شارتتى جازا الدى. ول قاجەتتى قورعانىس شەگىنەن اسىرىپ, اۋىر دەنە جاراقاتىن كەلتىرگەنى ءۇشىن جانە ادامدى زاڭسىز بوستاندىقتان ايىرعانى ءۇشىن كىنالى دەپ تانىلدى.
التىنشى ايىپتالۋشى — ەراسىل توقتاسىن — جابىرلەنۋشىمەن تاتۋلاسقان سوڭ جاۋاپكەرشىلىكتەن بوساتىلدى.
سوتتا ايىپتالۋشىلار ءوز كىناسان مويىندادى. سونداي-اق ولاردىڭ كىناسى جاسىرىن تەرگەۋ ارەكەتتەرىمەن, ساراپتاما ناتيجەلەرىمەن جانە وزگە دە دالەلدەرمەن راستالدى. ۇكىم ءالى زاڭدى كۇشىنە ەنگەن جوق, تاراپتاردىڭ اپەللياتسيالىق شاعىم بەرۋ قۇقىعى بار.
ەسكە سالايىق, ارمان جۇماگەلديەۆ 2022 جىلعى قاڭتارداعى جاپپاي تارتىپسىزدىكتەرگە بايلانىستى 20 جىلعا باس بوستاندىعىنان ايىرىلعان ەدى. قىلمىس الەمىنىڭ سەركەسى جاپپاي تارتىپسىزدىكتەرگە قاتىسىپ, ولاردى ۇيىمداستىرعانى, ادام ۇرلاپ, ونىڭ ولىمىنە سەبەپ بولعانى, سونداي-اق ادامدى زاڭسىز بوستاندىقتان ايىرعانى ءۇشىن كىنالى دەپ تانىلدى. وعان 10 جىل بويى قوعامدىق-ساياسي جانە پۋبليتسيستيكالىق قىزمەتپەن اينالىسۋعا تىيىم سالىندى.
