شىمكەنتتە قىزدى كيىمى ءۇشىن كولىك جۇرگىزۋ ەمتيحانىنا جىبەرمەي قويعان

جەلىدە پراكتيكالىق ەمتيحاندى تاپسىرۋعا ىشكويلەك كيىپ كەلگەنىن, وسىعان بايلانىستى وعان ەمتيحاندى تاپسىرۋعا رۇقسات ەتىلمەگەنىن ايتقان قىزدىڭ ۆيدەوسى پايدا بولدى. جاعدايدى قىزىنا ۇستىندەگى فۋتبولكاسىن شەشىپ بەرگەن اكەسى قۇتقاردى.

ءبىز ۆيدەو اۆتورىمەن بايلانىسقا شىقتىق. ول وزىنە ەمتيحان تاپسىرۋعا رۇقسات ەتىلمەگەنىن ءتۇسىندىردى, ويتكەنى جۇرگىزۋشى كۋالىگىنىڭ فوتوسۋرەتى «ۇيلەسپەيتىن سىرت كەلبەتكە بايلانىستى» تۇسىرىلمەدى.

«مەن پراكتيكالىق ەمتيحانعا كەلدىم. ولار مەنى جۇرگىزۋشى كۋالىگى ءۇشىن سۋرەتكە تۇسىرگىسى كەلدى. مەنىڭ يىعىم اشىق بولعاندىقتان, اۆتو حقكو قىزمەتكەرى «ەمتيحانعا كىرۋگە رۇقسات ەتىلمەيدى» دەدى. مەن نە ىستەۋ كەرەگىن بىلمەدىم, سوسىن اكەمە جۇگىندىم, ول ماعان ءوز فۋتبولكاسىن شەشىپ بەردى», – دەدى ايدا تاۋباەۆا.

ءبىز «ازاماتتارعا ارنالعان ۇكىمەت» سايتىندا جەكە باسىن كۋالاندىراتىن قۇجاتتاردى رەسىمدەۋ كەزىندە فوتوسۋرەتتەرگە قويىلاتىن تالاپتاردى تەكسەردىك. الايدا كيىمگە قاتاڭ تالاپ بولعان جوق.

نەگىزگى تالاپتار بەتتىڭ ورنالاسۋىنا قاتىستى – سۋرەتكە ءتۇسۋشى بەيتاراپ ميميكامەن جانە جابىق اۋزىمەن كامەراعا تىكەلەي قاراۋى كەرەك. كوز سىقسيماۋى, ادىرايماۋى قاجەت, ك ۇلىمسىرەۋگە بولمايدى. سونداي-اق, بەتتىڭ اشىقتىق دارەجەسىنە قويىلاتىن تالاپتار بار, شاش كوزدى جاپپاۋى كەرەك, كۇننەن قورعايتىن نەمەسە شاعىلىستىراتىن كوزىلدىرىك بولماۋى كەرەك, ال ەگەر كوزىلدىرىك دەنساۋلىققا بايلانىستى بولسا, جاقتاۋ كوزدى جاپپاۋى كەرەك. باس كيىمدەرگە جول بەرىلمەيدى, ءدىني نەمەسە مەديتسينالىق سەبەپتەر بويىنشا باس جابىنى ەرەكشەلىك بولىپ تابىلادى.

كيىمگە قويىلاتىن تالاپتار تۋرالى اقپاراتتى ناقتىلاۋ ءۇشىن ءبىز «ازاماتتارعا ارنالعان ۇكىمەتتىڭ» ءباسپاسوز قىزمەتىنە حابارلاستىق.

شىمكەنت قالاسى بويىنشا مەملەكەتتىك كورپوراتسيانىڭ فيليالىندا اتالعان دەرەك بويىنشا قىزمەتتىك تەرگەۋ باستالعانىن حابارلادى. قازىرگى ۋاقىتتا قىزدىڭ ەمتيحانعا جىبەرىلمەۋىنىڭ ناقتى سەبەپتەرى, سونداي-اق بۇل جاعدايدا قانداي ەرەجەلەر قولدانىلعانى بەلگىسىز.

«جۇرگىزۋشى كۋالىگىن الۋ ءۇشىن سۋرەتكە ءتۇسۋ راسىمىنە يىعى جابىق كيىممەن كەلۋ ۇسىنىلعان قىزمەت الۋشىعا قاتىستى قىزمەتتىك تەرگەۋ جۇرگىزىلەدى. ارنايى حقكو مامانىنىڭ كىناسى انىقتالعان جاعدايدا تارتىپتىك شارالار قابىلدانادى. بولاشاقتا مۇنداي جاعدايلاردى بولدىرماۋ ءۇشىن مامانداندىرىلعان حقكو قىزمەتكەرلەرى ءۇشىن ءتۇسىندىرۋ جۇمىستارى جۇرگىزىلەدى», – دەپ ۋادە بەردى مەملەكەتتىك كورپوراتسيا.