شىمكەنتتە پسيحيكالىق اۋىتقۋىنا قاراماستان اۆتوبۋس تىزگىندەگەن جۇرگىزۋشىلەر انىقتالدى

فوتو: اشىق دەرەككوز

شاھاردا پسيحيكالىق ديسپانسەردە تىركەۋدە تۇرسا دا, كولىك تىزگىندەۋدەن قورىقپاعان مىڭنان اسا ازامات قولعا ءتۇستى. اۋىتقۋشىلىعىنىڭ بارىنا قاراماستان رولگە وتىرعاندار جۇرتقا كەسىرىن تيگىزىپ تە ۇلگەرگەن. جەرگىلىكتى پروكۋراتۋرا قىزمەتىنىڭ مالىمەتىنە سۇيەنسەك, بىلتىر 1300 رەت ەرەجە بۇزىپ, 28 جول-كولىك وقيعاسىنا كىنالى بولعان, – دەپ حابارلايدى Aikyn.kz سايتى almaty.tv-گە سىلتەمە جاساپ.

زاڭدى ءبىر شەتكە ىسىرىپ, وزگەنىڭ ومىرىنە سالعىرت قاراعان جۇرگىزۋشىلەردىڭ كۋالىگىن جارامسىز ەتۋ قولعا الىندى.

– سوتقا تالاپ-ارىز بەرىلىپ, 200-دەن استام ادامنىڭ جۇرگىزۋشى كۋالىگىنە شەكتەۋ قويىلدى. بۇل كىسىلەردىڭ مەديتسينالىق قارسى كورسەتىلىمى بولا تۇرا, جۇرگىزۋشى كۋالىگىن الۋى قاۋىپتى ەكەنىن اتاپ وتەمىز. 2023 جىلى قاداعالاۋ اكتىسى ەنگىزىلگەن. سوتتا ءىس قارالىپ جاتىر, – دەدى قالالىق پروكۋراتۋرا باسقارماسىنىڭ اعا پروكۋرورى قالي بەيسەنوۆ.

پروكۋراتۋرانىڭ دەرەگى بويىنشا, شىمكەنتتە ناركولوگيالىق جانە پسيحونەۆرولوگيالىق ەسەپتە تۇرعان 10 اۆتوبۋس جۇرگىزۋشىلەرى انىقتالعان. سونداي-اق تەكسەرۋ كەزىندە 7 ازاماتتىڭ كۋالىگى قوعامدىق كولىك تىزگىندەۋگە سايكەس كەلمەيتىنى بەلگىگى بولدى. ال حالىققا قىزمەت كورسەتۋ ورتالىعىنىڭ ماماندارىنا «ازاماتتار كۋالىك الاردا مەديتسينالىق انىقتامادا ءمىن بولعان جوق» دەپ اقتالدى.

– باعدارلامادا ناركولوگيالىق جانە پسيحونەۆرولوگيالىق ديسپانسەرمەن ينتەگراتسيا جاسالعان. بازادا كورسەتىلگەن دەرەكتەر تەكسەرىلەدى. ناركولوگيالىق, پسيحونەۆرولوگيالىق ديسپەنسەردە تىركەۋدە تۇرعان جاعدايدا بازادا كورسەتىلۋى ءتيىس, سايكەسىنشە ول كىسىگە قىزمەت كورسەتۋدى توقتاتامىز, – دەدى  №1 مامانداندىرىلعان حالىققا قىزمەت كورسەتۋ ورتالىعى ءبولىم باسشىسىنىڭ ورىنباسارى فارحان بايزيەۆ.

ەل بويىنشا شىمكەنت جول-كولىك اپاتى ءجيى بولاتىن اۋماقتار اراسىندا العاشقى بەستىكتە تۇر. بۇل كورسەتكىشكە ۇلەسىن قوسقاندار قاتارىندا پسيحيكالىق اۋىتقۋىنا قاراماستان كولىك تىزگىندەگەن جۇرگىزۋشىلەر دە بار. شاھاردا اقىل-ەسىنىڭ اۋىتقۋشىلىعىنا بايلانىستى 12 مىڭ ازامات تىركەۋدە تۇرسا, ونىڭ 1000-نان استامى ناركولوگيالىق ديسپانسەردە ەم الادى.