جاڭالىقتار
شىمكەنتتە پسيحونەۆرولوگيالىق ديسپانسەر قىزمەتكەرلەرى سوتتالۋى مۇمكىن
فوتو: اشىق دەرەككوز
شىمكەنتتە پسيحونەۆرولوگيالىق ديسپانسەر قىزمەتكەرلەرىنە قاتىستى ناۋقاستاردى زورلاۋ فاكتىسى بويىنشا سوت ءىسى قارالىپ جاتىر. بۇل تۋرالى qandastar.kz Stan.kz سايتىنا سىلتەپ.
شىمكەنت سوتىنىڭ ءباسپاسوز قىزمەتى حابارلاعانداي, قىلمىستىق ءىس سوتتا جابىق رەجيمدە قارالىپ جاتىر.
كۇدىكتىلەرگە قىلمىستىق كودەكسىنىڭ 120-بابى 3-1-بولىگى 1-تارماعى («زورلاۋ») بويىنشا ايىپ تاعىلعان.
سوتتالۋشىلار – شىمكەنتتە ورنالاسقان پسيحونەۆرولوگيالىق ديسپانسەردىڭ قىزمەتكەرلەرى ەكەنى بەلگىلى بولدى.
ايتا كەتەيىك, 2024 جىلدىڭ جەلتوقسان ايىندا بەلگىلى قازاقستاندىق قۇقىق قورعاۋشى ايمان وماروۆا ارنايى مەكەمەدەگى پاتسيەنتتەردى زورلاۋ فاكتىلەرى تۋرالى مالىمدەگەن ەدى. سول كەزدە ادۆوكات بۇل ءىستىڭ كۇدىكتىلەرى نەگە قاماۋعا الىنباعانىن سۇراعان ەدى.
سونىمەن قاتار 2024 جىلدىڭ قاراشا ايىندا تۇركىستان وبلىستىق پسيحيكالىق دەنساۋلىق ورتالىعىندا ەم العان 17 جاستاعى پاتسيەنتتىڭ اناسى ەكى اي وتكەن سوڭ قىزىنىڭ جۇكتى ەكەنىن بىلگەن. ايەلدىڭ ايتۋىنشا, قىزى مەديتسينالىق قىزمەتكەرلەر تاراپىنان زورلىق كورگەن.
