شىمكەنتتە سۋبسيديادان قاعىلعان شارۋالار شىعىنعا باتتى

شىمكەنتتە سۋبسيديادان ءۇمىت ۇزگەن شارۋالار مالىن ساتۋعا ءماجبۇر. ويتكەنى شاھار دەربەس قالا مارتەبەسىنە يە بولعالى اۋىل شارۋاشىلىعى ماقساتىنداعى جەردىڭ ساناتى وزگەرگەن. سونىڭ سالدارىنان قازىردىڭ وزىندە ايماقتاعى 17 ءىرى مال شارۋشالىعى جۇمىسىن توقتاتتى.

كۇندەلىكتى 100 شاقتى ساۋىن سيىردان تۇسەتىن پايدا جەم-شوپپەن بىرگە جۇتىلىپ بارادى. شارۋا مەملەكەت تاراپىنان ءسۇتتىڭ ليترىنە 30 تەڭگەدەن بەرىلەتىن سۋبسيديا قارجىنى ءبىر جىلدان بەرى الا الماي كەلەدى. قىستاعىداي ەمەس, جاز كەلىپ ءسۇتتىڭ باعاسى دا ەكى ەسەدەي ارزانداپ كەتتى. ونىڭ ۇستىنە شەتەلدەن كەلىپ جاتقان ءسۇت ونىمدەرىن الماستىرعىش ارزانقول قوسپالار شارۋانى مۇلدەم شاتقاياقتاتىپ جىبەردى.

قايرات ازامات ۇلى, شارۋا قوجالىعىنىڭ زووتەحنيگى:

ەسەپتەيتىن بولساق, ءبىر كۇندە 1 باسقا 3500 مىڭ تەڭگە كەتەدى. قازىرگى ۋاقىتتا ءبىزدىڭ وتكىزىپ جاتقان ءسۇتىمىز 160-180 تەڭگە. ءوزىنىڭ جەگەن جەم-ءشوبىن اقتاماي جاتىر. ەرتەڭگى كۇنى مۇنى جابايىق دەسەك, نەسيەگە الىنعان مالدار. ونى ساتساق بانكروت بولامىز.

شىمكەنت قالاسىنداعى 30-دان استام ءسۇت فەرماسىندا جاعداي وسى. اسىلتۇقىمدى سيىر ءوسىرىپ, ودان ءسۇت ساۋىپ وتىرعان شارۋاشىلىقتىڭ دەنى قالا ۇلعايىپ, وبلىستان ىرگە اجىراتقان كەزدە شاھار اۋماعىنا قوسىلعاندار. مەنشىگىندە جايىلىمى مەن ەگىستىكتەرى دە بار. ال بىراق ەلەكتروندى پورتال ولاردىڭ جەرى ەلدىمەكەن دەپ ءوتىنىمدى قابىلدامايدى.

جاننا جۇماشەۆا, شارۋا قوجالىعىنىڭ ەسەپشىسى:

قازىرگى پروگرامما بويىنشا ءبىزدىڭ كاداستردى ەنگىزسەڭ دە, ين, بين-ءدى ەنگىزسەڭ دە بىزدە جەر جوق بولىپ شىعادى. سوندىقتان جەرىڭ جوق, سوعان سايكەس شارۋشالىعىڭ دا جوق دەيدى. جوق نارسەگە سۋبسيديا قالاي بەرىلەدى? سونداي قيىندىق تۋىنداپ, 8 ايدان بەرى سۋبسيديا الا المايمىز.

شارۋانى ءسۇتتىڭ سۋبسيدياسىنان ايىرعان «اسىلتۇقىمدى مال شارۋاشىلىعىن دامىتۋ تۇجىرىمداماسى». قۇجات بويىنشا مەملەكەتتىك قولداۋ تەك قاراماعىندا اۋىلشارۋاشىلىعى ماقساتىندا پايدالاناتىن جەرى بار شارۋالارعا بەرىلۋى ءتيىس. ال شىمكەنت مەگاپوليس اتانعالى بۇكىل جەرى ەلدىمەكەن مارتەبەسىنە يە. وسىنى ايتىپ, ?ۇكىمەتكە ارىز دا جازىلدى. كوميسسيا دا كەلىپ تەكسەردى. مينيستر ماقۇلدادى. بىراق ناتيجەسىز.

تالعات مەكەنباەۆ, قالالىق اۋىل شارۋاشىلىعى جانە ۆەتەريناريا باسقارماسى باسشىسىنىڭ مىندەتىن اتقارۋشى:

كوميسسيا بۇكىل شارۋانى كورىپ, اكتىلەرىن ءتۇزىپ, ۆيدەو, فوتوعا, قالا بولسا دا شارۋالار بار ەكەنىن كورىپ, الىپ كەتكەن. قاعيداعا وزگەرىس ەنگىزەمىز دەگەن.

بۇگىنگى تاڭدا شىمكەنتتىڭ تەرريتورياسى 116 مىڭ گەكتار بولسا, سونىڭ جارتىسىنا جۋىعى اۋىلشارۋاشىلىعى القابى. 5 مىڭنان استام شارۋا قوجالىعى جۇمىس ىستەيدى. وزگە ونىمدەردى ايتپاعاننىڭ وزىندە فەرمالار بىلتىر 56 مىڭ توننا ءسۇت وندىرگەن. ەندى جاڭا تۇجىرىمدامانىڭ ارقاسىندا شارۋا قولداۋسىز, حالىق ازىقسىز قالاتىن ءتۇرى بار.