شىمكەنتتە تاربيەشى بەلگىسىز زاتپەن بالانى ۇرىپ-سوققان

شىمكەنتتەگى جەكەمەنشىك بالاباقشالاردىڭ بىرىندە تاربيەشى بالالاردى ۇرىپ-سوققان. بۇل تۋرالى ۆيدەو جەلىدە تارادى, دەپ حابارلايدى KYN.KZ اقپارات اگەنتتىگى.

ۆيدەو اۆتورىنىڭ حابارلاۋىنشا, وقيعا شىمكەنتتەگى «سۇلەيمەن» جەكەمەنشىك بالاباقشاسىندا ورىن العان.

بەينەجازبادان تاربيەشىنىڭ توسەكتە جاتقان بالانى بەلگىسىز زاتپەن ۇرعانىن بايقاۋعا بولادى. ارى قاراي بالانى اياعىنان ۇستاپ, بولمەنىڭ ورتاسىنا سۇيرەپ اپارادى. ودان كەيىن باسىنان ۇرعان. قاسىندا جاتقان بالا توسەگىنەن تۇرىپ, تاربيەشى ۇرىپ جاتقان بۇلدىرشىنگە كومەكتەسپەك بولادى. بىراق تاربيەشى يتەرىپ جىبەرىپ, توسەگىنە قايتا جاتقىزعان.

بولعان جاعدايعا قاتىستى وقۋ-اعارتۋ مينيسترلىگى تاربيەشىنىڭ جۇمىستان بوساتىلعانىن مالىمدەدى.

«قازىر سوت-مەديتسينالىق ساراپتاما تاعايىندالدى. اتالعان فاكتى بويىنشا تەرگەۋ امالدارى جۇرگىزىلىپ جاتىر. وقيعا وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ باقىلاۋىندا», – دەپ حابارلادى مينيسترلىك.