جاڭالىقتار
شىمكەنتتە تۋعان اپكەسىنىڭ بالاسىن ولتىرگەن ايەل سوتتالدى
فوتو: اشىق دەرەككوز
جانتۇرشىگەرلىك وقيعا شىمكەنتتە 2024 جىلى بولعان. 30 جاستاعى ايەل ۇيقىدان جىلاپ ويانعانى ءۇشىن 6 جاسار قىزدىڭ اياق-قولىن بايلاپ, ۇرىپ-سوققان, – دەپ جازدى qandastar.kz
ايەل جەرگە قۇلاعان قىزدى ۇرىپ-سوعىپ, قورلاعان. قاتتى سوققىدان بالاقاي ەسىنەن تانىپ, ال ايەلدىڭ ايۋاندىق ارەكەتى بۇدان ءارى جالعاسا تۇسكەن. سوڭىندا ول تۋعان اپكەسىنىڭ بالاسىن سۋ تولتىرىلعان ۆانناعا جاتقىزىپ, تۇنشىقتىرىپ ولتىرگەن.
ايىپتالۋشى سوتتا قاساقانا جاساعان ارەكەتىن مويىنداماي, ءتىپتى جەڭىل جازا بەرۋدى سۇراعان.
«پروكۋرور ق.-عا 20 جىلعا باس بوستاندىعىنان ايىرۋ جازاسىن تاعايىنداۋدى سۇرادى. جابىرلەنۋشىنىڭ وكىلى سوتتالۋشىعا كەشىرىم بەرگەنىن جانە قاتاڭ جازا تاعايىنداماۋدى سۇرادى. سوتتالۋشى وزىنە تاعىلعان ايىپتى مويىندامايتىنىن جانە جەڭىل جازا تاعايىنداۋدى سۇرادى», – دەلىنگەن شىمكەنت قالالىق سوتىنىڭ حابارلاماسىندا.
سوت قىلمىسكەر ايەلدىڭ جەڭىلدىك سۇراعان ءوتىنىشىن قابىلداعان جوق. وعان 20 جىلعا باس بوستاندىعىنان ايىرۋ جازاسى تاعايىندالدى. ەندى ول 50 جاسقا دەيىن جازاسىن قاتاڭدىعى ورتاشا مەكەمەدە وتەيدى.
