شىمكەنتتە ءۇشىنشى ۇشەم دۇنيەگە كەلدى

شىمكەنت قالالىق پەرزەنتحاناسىندا 24 جاستاعى فەرۋزا راحيموۆا ۇشەم – ەكى ۇل جانە ءبىر قىز بوساندى, دەپ حابارلايدى Qandastar.kz اقپارات پورتالى.

بۇل – ونىڭ العاشقى بوسانۋى. سابيلەر جۇكتىلىكتىڭ 31-اپتاسىندا دۇنيەگە كەلىپ, مەديتسينالىق كومەكتى قاجەت ەتتى. قازىر ولاردىڭ جاعدايى تۇراقتى دەپ باعالانۋدا.

شىمكەنت قالاسىنىڭ دەنساۋلىق ساقتاۋ باسقارماسىنىڭ ءباسپاسوز قىزمەتىنىڭ مالىمەتىنشە, نارەستەلەر تۋىلعان كەزدە اۋىر جاعدايدا بولعان, ولار جانساقتاۋ بولىمىندە ەم قابىلداپ, باقىلاۋدا بولعان. ولارعا دەر كەزىندە تىنىس الۋ اپپاراتتارىنىڭ كومەگىمەن قاجەتتى كومەك كورسەتىلگەن. قازىر سابيلەردىڭ جاعدايى جاقساردى, ولار انا سۇتىمەن قورەكتەنە باستادى جانە انالارىنىڭ جاعدايىمەن بىرگە جاقسى دەپ باعالانۋدا.

«مەديتسينالىق پەرسونالدىڭ كاسىبيلىگىنىڭ ارقاسىندا بالالار قاجەتتى ەم الىپ, سالماق قوسىپ, انا سۇتىمەن ەمۋدى باستادى. قازىر انا مەن سابيلەردىڭ جاعدايى تۇراقتى جانە قاناعاتتانارلىق», – دەپ حابارلادى قالالىق دەنساۋلىق ساقتاۋ باسقارماسى.

جاڭا تۋعان سابيلەرگە مۇستافا, مۇسا جانە حاديا ەسىمدەرى بەرىلدى. 2025 جىلدىڭ باسىنان بەرى شىمكەنتتە 12 648 ءسابي دۇنيەگە كەلگەن, ولاردىڭ ىشىندە 149 ەگىز جانە 3 ۇشەم تىركەلگەن.