شىمكەنتتىك ايەل قۇربىسىنىڭ تويىندا پاتەر سىيلادى

فوتو:

فوتو: ۆيدەودان كادر

شىمكەنتتىك بلوگەر قۇربىسىنىڭ تويىندا وعان ءبىر بولمەلى پاتەر سىيلادى, – دەپ حابارلايدى Massaget.kz ءتىلشىسى.

ۆيدەو بلوگەر ايا اجىبەكتىڭ الەۋمەتتىك جەلىدەگى پاراقشاسىندا جاريالاندى. ول ستۋدەنت كەزىندە تانىسقان قۇربىسىنا تويعا سىيلىق رەتىندە باسپانانىڭ كىلتىن تابىستادى. ايتۋىنشا, قۇربىسى ءاردايىم جانىندا بولىپ, قيىن كەزەڭدەردە قولعابىس ەتكەن.

بلوگەر الدىمەن قىزىق ءۇشىن قۇربىسى مەن كۇيەۋىنە تۇيە جۇنىنەن تىگىلگەن ش ۇلىق, 10 مىڭ تەڭگە قولما-قول اقشا, ءبىر قوراپ شاي, شەمىشكە, جىلدام دايىندالاتىن كەسپە, جەلدەتكىش, التىن بىلەزىك سىيلادى. سونداي-اق, قۇربىسى مەن جۇبايىنىڭ ەكى اناسىنا التىن جۇزىك تاقتى.

«قۇربىما تويىندا 1 بولمەلى پاتەر سىيلادىم. ءيا, بۇل مەنىڭ جان قۇربىم, قۇربىمنان ەشنارسە ايامايمىن. ودان بولەك, ءبىر جاسار قىزىنا 1,5 ميلليوندىق وريگينال Cartie برەندىنەن بىلەزىك سىيلادىم. كەزىندە ەكەۋىمىز الماتىنىڭ ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە تانىستىق. اسەل – مەن ءۇشىن الەمنىڭ ەشبىر بايلىعىنا جەتپەيتىن قىمبات جان, اللانىڭ سىيى. مەنىڭ ءتىپتى ءبىر دانا فۋتبولكا الۋعا اقشام بولماعان كەزدە, وزىندەگى ەڭ ادەمى كيىمىن بەردى. بارار جەرىم, باسار تاۋىم بولماعاندا مەنى ءوز پاناسىنا قۋانا-قۋانا الدى. قولىنداعى 500 تەڭگەسىنىڭ سوڭعى تيىنىنا دەيىن مەنىمەن ءبولىستى. اتا-انامنىڭ ماحابباتى جەتىسپەگەن كەزدە, سول قۋىستى ءوزىنىڭ ىستىق كوڭىلىمەن تولتىرا الدى. كۇيەۋىممەن اجىراسىپ, ءوز جۇرتىم ماعان «كەت» دەگەندە, «ماعان كەلشى» دەپ وزىندە پانالاتقان جان قۇربىم مەن ونىڭ وتباسى. كەزىندەگى ءالسىز, جۇرەگى جارالى ايانى كورگەن, ەشكىم ماعان سەنبەسە دە, ءوزىنىڭ سەنىمىمەن قولداۋ بەرگەن جان قۇربىم! الەمنىڭ قاي جەرىندە جۇرسەم دە, مەنىڭ پەرىشتەرىم بار ەكەنىن بىلەمىن. ول – اسەل. اسەل مەن ءۇشىن جاي عانا قۇربى ەمەس, ول – جۇرەگىمنىڭ ىشىندەگى جۇرەگىم. ارقاشان ماعان قولداۋ, دەمەۋ بولعان مۇنداي جاننان ەشتەڭەنى ايامايمىن. بارىمدى بەرۋگە دايىنمىن. بۇگىنگى سۇندەت تويىندا 1 بولمەلى پاتەر سىيلادىم», – دەپ جازعان ول.