شىمكەنتتىك شەنەۋنىكتەر كاسىپكەرلەردى بازارعا كۇشتەپ كوشىرمەك پە?

فوتو: ەگەمەن قازاقستان

شىمكەنتتە اشۋعا بۋلىققان ەلۋدەن استام كاسىپكەر اكىمدىكتە شۋ شىعاردى. قالا ىشىندە قۇم مەن شاعال تاس ساتاتىن ەر ادامدار جاۋاپتىلار جۇمىس ىستەۋگە مۇرشا بەرمەي جاتىر دەپ اشىنادى. جىل باسىندا جينالعان جۇرتقا جاڭا بازارعا كوشۋ جايلى اقپارات ايتىلعان ەكەن. بىراق اتالعان ورتالىقتار ساۋدا جاساۋعا دايىن بولمادى دەيدى. بۇل تۋرالى Stan.kz اقپارات اگەنتتىگى حابارلايدى.

«بۇلار بىزگە نەگىزى 7 اي بەردىك دەيدى. ەشقانداي ۋاقىت بەرىلگەن جوق. وزدەرىنىڭ قالا سىرتىنداعى بازارى دايىن بولعان جوق. بىزگە باستا ايتىلعانى قالاداعى قۇم-تاستارىڭدى ازايتىپ, شەت-شەتىن قورشاپ, تازالىقتى ۇستاپ, جاڭا بازارعا قۇمداردى ۇيىڭدەر دەگەن. سول كەزدە ىستەيسىڭدەر دەپ تالاپ قويدى. ءبىز ونى دا ىستەدىك. تىنىشتىق بەرسىن دەپ كليەنت كەلمەسە دە جۇك كولىكتەرىمەن تاۋار تاسىدىق. ەندى كەلىپ, سوزدەرىنەن اينىپ وتىر. ۋادە بەرگەسىن ورىنداۋ كەرەك قوي»,- دەيدى كاسىپكەر ارىسباي قامىتبەكوۆ.

شىمكەنت قالاسىنىڭ ىشىندە قۇم مەن شاعالتاس ساتاتىن جيىرمادان استام ورىن بار. ءبارى دە جەر ۇيلەر ورنالاسقان ۋچاسكە اۋماعىندا جۇمىس ىستەيدى. قالانىڭ ءار بۇرىشىنداعى مۇنداي نۇكتەلەردەن كۇنىنە وتىز شاقتى جۇك كولىگىنىڭ جۇرگىزۋشىلەرى قۇرىلىس زاتتارىن اكەتىپ ساتادى. ناپاقامىزدى ادال ەڭبەكپەن تاۋىپ جاتىرمىز دەگەن جۇمىسشىلار ەكى كۇن بۇرىن اكىمدىك وكىلدەرى كەلىپ قيىرشىقتىڭ ءبارىن قوپارىپ كەتكەنىن ايتادى.

«ەكى كۇن بۇرىن عانا ءتارتىپ ساقشىلارىمەن بىرگە كەلىپ, تۇرعان شاعال تاس مەن قۇمداردى جۇك كولىگىمەن جانشىپ كەتتى. التى ءجۇز مىڭ تەڭگەنىڭ زاتى ارالاسىپ, جارامسىز بولىپ قالدى. ەندى ول اقشانى كىم ءوندىرىپ بەرەدى? كىمنەن كومەك سۇرايمىز? حالىقتىڭ ارقاسۇيەر ادامدارىنىڭ ءوزى وسىلاي جاساپ جاتسا قايدا بارارىڭدى دا بىلمەي قالادى ەكەنسىڭ»,- دەيدى جيىرما جىلدان بەرى قۇرىلىس زاتىن ساتۋدى كاسىپكە اينالدىرعان اۋجانعالي مەدەتبەكوۆ.

سودان بەرى قۇرىلىس زاتتارىن ساتاتىن كاسىپكەرلەردەن مازا قاشقان. ونسىز دا كۇن سايىن سالىناتىن ايپپۇلعا ەت ۇيرەندى دەگەن كورشىلىك بيلىك وكىلدەرى قىسپاققا الماي جۇمىس ىستەۋگە مۇرشا بەرسىن دەيدى.

«بىزگە مۇنداي شابۋىل جاسايتىن بولسا, ماۋسىم باسىندا جاساۋ كەرەك ەدى. بىزدە ساۋدا جىلدىڭ ءبىر-اق مەزگىلىندە بولادى. ول جاز. قازىر نە سوڭى ەمەس, نە باسى ەمەس. «قالانىڭ كوركىن كەتىرمەۋ ءۇشىن قورشاۋ سالىڭدار» دەدى. ونى دا ىستەدىك. ەندى نە كەرەك? تۇسىنبەيمىز», – دەيدى كاسىپكەرلەر.

الايدا, كاسىپكەرلەر بازىناسىنا جەرگىلىكتى جاۋاپتىلار ءتىپتى باسقاشا كوزقاراستا. سوزدەرىنشە, قالا ىشىندە قۇم مەن قيىرشىق تاس ساتۋ بيۋدجەت قارجىسىنا سالىنعان جولدىڭ توز-توزىن شىعارۋعا اكەلەدى. سوندىقتان كاسىپ يەلەرىنىڭ ءبارى قالا سىرتىندا دايىن تۇرعان بازارلارعا كوشۋ كەرەك دەيدى.

«قالانىڭ كوشەلەرى بيۋدجەتتىڭ قارجىسىنا سالىنعاننان كەيىن قۇم جاي عانا اربامەن كەلمەيدى. ۇلكەن ماشينالارمەن كەلەدى. بەلگىلەنگەن مۇلشەردەن تىس ارتىق جۇك ارتىپ كەلگەننەن كەيىن قالادا كوشەلەرىنىڭ بۇزىلۋىنا جانە توزۋىنا اكەپ سوعۋدا. بۇل ماسەلەنى ولار ەسكەرمەيدى. تەك قانا ءوز جاعدايىن ويلايدى. تەك قانا ءوز پايداسىن ويلايدى», – دەيدى شىمكەنت قالاسىنىڭ كاسىپكەرلىكتى جانە يندۋستريالدىق ينوۆاتسيالىق دامۋ باسقارماسى باسشىسىنىڭ ورىنباسارى ۇسەن يساەۆ.

ايتا كەتۋ كەرەك, قازىر كاسىپ يەلەرىنىڭ ءبارى وزدەرى ساتىپ العن جەر ۋچاسكەلەرىندە ساۋدا جاساپ جاتىر. ول قالانىڭ ءار تۇكپىرىندە ورنالاسقان.