Shymkenttik sheneýnikter kásipkerlerdi bazarǵa kúshtep kóshirmek pe?

Foto: Egemen Qazaqstan

Shymkentte ashýǵa býlyqqan elýden astam kásipker ákimdikte shý shyǵardy. Qala ishinde qum men shaǵal tas satatyn er adamdar jaýaptylar jumys isteýge mursha bermeı jatyr dep ashynady. Jyl basynda jınalǵan jurtqa jańa bazarǵa kóshý jaıly aqparat aıtylǵan eken. Biraq atalǵan ortalyqtar saýda jasaýǵa daıyn bolmady deıdi. Bul týraly Stan.kz aqparat agenttigi habarlaıdy.

«Bular bizge negizi 7 aı berdik deıdi. Eshqandaı ýaqyt berilgen joq. О́zderiniń qala syrtyndaǵy bazary daıyn bolǵan joq. Bizge basta aıtylǵany qaladaǵy qum-tastaryńdy azaıtyp, shet-shetin qorshap, tazalyqty ustap, jańa bazarǵa qumdardy úıińder degen. Sol kezde isteısińder dep talap qoıdy. Biz ony da istedik. Tynyshtyq bersin dep klıent kelmese de júk kólikterimen taýar tasydyq. Endi kelip, sózderinen aınyp otyr. Ýáde bergesin oryndaý kerek qoı»,- deıdi kásipker Arysbaı Qamytbekov.

Shymkent qalasynyń ishinde qum men shaǵaltas satatyn jıyrmadan astam oryn bar. Bári de jer úıler ornalasqan ýchaske aýmaǵynda jumys isteıdi. Qalanyń ár buryshyndaǵy mundaı núktelerden kúnine otyz shaqty júk kóliginiń júrgizýshileri qurylys zattaryn áketip satady. Nápaqamyzdy adal eńbekpen taýyp jatyrmyz degen jumysshylar eki kún buryn ákimdik ókilderi kelip qıyrshyqtyń bárin qoparyp ketkenin aıtady.

«Eki kún buryn ǵana tártip saqshylarymen birge kelip, turǵan shaǵal tas men qumdardy júk kóligimen janshyp ketti. Alty júz myń teńgeniń zaty aralasyp, jaramsyz bolyp qaldy. Endi ol aqshany kim óndirip beredi? Kimnen kómek suraımyz? Halyqtyń arqasúıer adamdarynyń ózi osylaı jasap jatsa qaıda bararyńdy da bilmeı qalady ekensiń»,- deıdi jıyrma jyldan beri qurylys zatyn satýdy kásipke aınaldyrǵan Aýjanǵalı Medetbekov.

Sodan beri qurylys zattaryn satatyn kásipkerlerden maza qashqan. Onsyz da kún saıyn salynatyn aıppulǵa et úırendi degen kórshilik bılik ókilderi qyspaqqa almaı jumys isteýge mursha bersin deıdi.

«Bizge mundaı shabýyl jasaıtyn bolsa, maýsym basynda jasaý kerek edi. Bizde saýda jyldyń bir-aq mezgilinde bolady. Ol jaz. Qazir ne sońy emes, ne basy emes. «Qalanyń kórkin ketirmeý úshin qorshaý salyńdar» dedi. Ony da istedik. Endi ne kerek? Túsinbeımiz», – deıdi kásipkerler.

Alaıda, kásipkerler bazynasyna jergilikti jaýaptylar tipti basqasha kózqarasta. Sózderinshe, qala ishinde qum men qıyrshyq tas satý bıýdjet qarjysyna salynǵan joldyń toz-tozyn shyǵarýǵa ákeledi. Sondyqtan kásip ıeleriniń bári qala syrtynda daıyn turǵan bazarlarǵa kóshý kerek deıdi.

«Qalanyń kósheleri bıýdjettiń qarjysyna salynǵannan keıin qum jaı ǵana arbamen kelmeıdi. Úlken máshınalarmen keledi. Belgilengen mulsherden tys artyq júk artyp kelgennen keıin qalada kósheleriniń buzylýyna jáne tozýyna ákep soǵýda. Bul máseleni olar eskermeıdi. Tek qana óz jaǵdaıyn oılaıdy. Tek qana óz paıdasyn oılaıdy», – deıdi Shymkent qalasynyń kásipkerlikti jáne ındýstrııaldyq ınovaııalyq damý basqarmasy basshysynyń orynbasary Úsen Isaev.

Aıta ketý kerek, qazir kásip ıeleriniń bári ózderi satyp alǵn jer ýchaskelerinde saýda jasap jatyr. Ol qalanyń ár túkpirinde ornalasqan.