شىمكەنتتىكتەر 24 كەلىلىك تاندىر سامسا ءپىسىرىلدى

فوتو: ىشكى ساياسات باسقارماسى

شىمكەنت — قوناقجايلىعىمەن, ءدامى ءتىل ۇيىرەر تاعامدارىمەن كەلگەن جاندى باۋراپ الادى. مۇنداعى اسحانانىڭ سانالۋاندىعى — عاسىرلار بويى قالىپتاسقان ءداستۇردىڭ, ءتۇرلى مادەنيەتتەردىڭ توعىسۋىنىڭ ايقىن كورىنىسى. قازاقتىڭ دارحان كوڭىلى مەن استىڭ بەرەكەسى ۇشتاسقان بۇل قالادا ءار تاعامنىڭ وزىندىك تاريحى, ءار ءدامنىڭ وزىندىك سىرى بار. بۇگىن ءال-فارابي الاڭىندا وتكەن مەرەكەلىك شارادا وسى ءبىر باي مۇرا تاعى ءبىر مارتە ايشىقتالدى, دەپ جازدى qandastar.kz

بارماعىنان بال تامعان اسپازدار ءوز ونەرلەرىن ورتاعا سالىپ, ءدامدى استى كوپشىلىككە ۇسىندى. بۇل ءىس شارا كوپشىلىكتىڭ كوڭىلىنەن شىققان اسىعا كۇتەتىن, ناعىز توي-دۋمان.

2022 جانە 2023 جىلدارى ۇلكەن تابىسقا جەتكەن «ءدامداسTour» فەستيۆالى بيىل دا ءوز جالعاسىن تاۋىپ, قالادا گاسترونوميالىق مەرەكە رەتىندە ءوتتى. بۇگىن فەستيۆالگە 50-دەن استام تاماقتاندىرۋ ورنى قاتىسىپ, وزدەرىنىڭ ءدامدى ءارى ەرەكشە تاعامدارىن ۇسىندى. شاراعا قالا اكىمى عابيت سىزدىقبەكوۆ ارنايى قاتىسىپ, اسپازداردىڭ تاعامدارىمەن, قولونەر شەبەرلەرىنىڭ بۇيىمدارىمەن تانىستى.

بۇل فەستيۆالدىڭ باستى جاڭالىعى سالماعى 24 كەلى شىعاتىن تاندىر سامسانىڭ دايىندالۋى. بۇل ەلىمىزدەگى العاش رەت جاسالعان ەڭ ۇلكەن سامسا. بۇل تۋرالى قازاقستان رەكوردتار كىتابىنىڭ رەسمي وكىلى باقىتجان ءسابيت ۇلى ايتتى.

— بۇگىن بۇرىن-سوڭدى بولماعان رەكورد ورناتىلىپ جاتىر. الىپ سامسانى پىسىرگەن شىمكەنت — گاسترونوميانىڭ استاناسى ەكەنىن تاعى ءبىر دالەلدەپ وتىر, — دەيدى ول.

ال, الىپ سامسانى ازىرلەگەن «كامال اتا» ءاسۇيىنىڭ باس اسپازى نەمات نارحوجاەۆ. بۇل تاعامدى ازىرلەۋ ءۇشىن 2 اپتا دايىندالعانىن جانە وڭاي بولماعانىن ايتادى.

— قۇرامى جانە ءپىسىرۋ ءتارتىبىن ەش وزگەرتكەنىمىز جوق. تەك كولەمىن ۇلعايتتىق. قيىن بولعانىن جاسىرمايمىن. العاشىندا ءۇي جاعدايىندا 17 كەلى سامسا ازىرلەدىك. وتە ءساتتى شىقتى. ال كوپشىلىككە ۇسىنعان تاندىر سامسا 24 كەلى شىقتى, — دەيدى باس اسپاز.

فەستيۆالدە تەك تاعام عانا ەمەس, سونىمەن قاتار ەرەكشە موتوسپورتتىق شارالار دا وتتى.

قىرعىزستان, وزبەكستان, تاجىكستان جانە باسقا قالالاردان موتوبايكەرلەر شىمكەنتكە ارنايى كەلىپ, وزدەرىنىڭ ەرەكشە موتوشەرۋىن جانە موتوشوۋىن ۇيىمداستىردى. بۇل شاراعا 100-دەن استام موتوبايكەر قاتىسىپ, قالا كوشەلەرىمەن وزدەرىنىڭ موتوتسيكلدەرىمەن ءساندى شەرۋ جاسادى. جيىن بارىسىندا قالا تۇرعىندارى مەن قوناقتارى, ەسترادا جۇلدىزدارىنىڭ كونتسەرتتىك باعدارلاماسىن تاماشالادى. ال جيىن سوڭىندا بولعان كاسىبي وتشاشۋ مەن الاۋ كورىنىسى قالا تۇرعىندارىنا اسەرلى ساتتەر سىيلادى.