شىمكەنتتىڭ اكىمى «ورداباسى» كلۋبىنا 1 ميلليارد تەڭگەنىڭ نە ءۇشىن بولىنگەنىن ايتتى

عابيت سىزدىقبەكوۆتىڭ سوزىنشە, 1 ميلليارد تەڭگە جالاقى بويىنشا مىندەتتەمەنى وتەۋ ءۇشىن ورىنداۋ ءۇشىن بولىنگەن.

«بىزدە جىل سوڭىنا دەيىن جالاقىنى تولىقتاي جابۋعا مىندەتتى بولدىق, سوندىقتان 1 ميلليارد تەڭگە ءبولىندى. ءار قارجىنىڭ ءوز ورنى بار. زاڭدى جولمەن بولىنگەن قاراجات», — دەپ ايتتى اكىم.

سونىمەن قاتار قالا باسشىسى «ورداباسى» كلۋبىنداعى لەگيونەرلەر ماسەلەسى جايلى دا تۇسىندىرمە بەردى.

«كلۋب لەگيونەرلەرمەن ۇزاق مەرزىمگە كەلىسىمگە قول قويعان. كەلىسىمدەر ۋەفا-دا تىركەلگەن. كەلىسىمشارت تالابى بويىنشا كورسەتىلگەن جالاقىنى سوڭىنا دەيىن تولەۋگە مىندەتتەلەمىز. تولەمەگەن جاعدايدا تەك «ورداباسى» كلۋبى ەمەس, ەلىمىزدىڭ فۋتبول فەدەراتسياسىنا سانكتسيا قولدانۋ قاۋپى بولدى. قازىر ءبىراز لەگيونەرلەر كەلىسىمشارت ۋاقىتى بىتكەندىكتەن, جۇمىسىن توقتاتتى. سونداي-اق ءوز جاستارىمىزدى شەتەلگە شىعارىپ, ەشقاشان بولماعان فورمامەن جاساقتادىق. كەلەر جىلى ءبىز باسقا وڭىرلەر سەكىلدى كوزدەلگەن قارجى بولەمىز, ودان ارتىق اقشا بولىنبەيدى», – دەيدى عابيت سىزدىقبەكوۆ.

ايتا كەتەيىك, بەلگىلى زاڭگەر ايگۇل ورىنبەك جەلىدەگى پاراقشاسىندا شىمكەنت اكىمدىگى «ورداباسى» فۋتبول كلۋبىنىڭ شەتەلدىك ويىنشىلارىنا حالىق قاراجاتىنان شامامەن 1 ميلليارد تەڭگە ءبولۋدى جوسپارلاپ وتىرعانىن جازعان ەدى.