شىمكەنتتىڭ باس ساۋلەتشىسى تەرگەۋگە الىندى

فوتو: Ertenmedia

شىمكەنتتىڭ باس ساۋلەتشىسى ارمان ابدەشوۆتىڭ ۇستالۋى اكىم ورىنباسارى رۋسلان بەردەنوۆتىڭ اتىشۋلى مالىمدەمەسىمەن بايلانىستى ەمەس, دەپ حابارلايدى qandastar.kz Ertenmedia دەرەككوزىنە سىلتەمە جاساپ.

ارنامىزعا جەتكەن ينسايدقا سايكەس, ابدەشوۆتىڭ ۇستىنەن قوزعالعان قىلمىستىق ءىس ونىڭ بۇعان دەيىنگى قىزمەتىنە جامبىل وبلىسىنداعى جۇمىس كەزەڭىنە قاتىستى.

ارمان ابدەشوۆ 2020-2022 جىلدارى جامبىل وبلىسى اكىمدىگىنىڭ ساۋلەت جانە قالا قۇرىلىسى باسقارماسىن باسقارعان. ءدال سول كەزەڭدە جاسالعان ىقتيمال زاڭسىزدىقتار ەندى عانا انىقتالىپ, قازىرگى تەرگەۋگە نەگىز بولىپ وتىر.

بۇعان دەيىنگى حابارىمىزدا بەردەنوۆتىڭ جينالىستاردا باسقارما باسشىلارىن انتيكور جانە ەكونوميكالىق تەرگەۋ قىزمەتىنىڭ تەكسەرىسىمەن قورقىتىپ كەلگەنىن جازعان ەدىك. 

كۇنى كەشە عانا قالا اكىمى عابيت سىزدىقبەكوۆتىڭ كومەكشىسى سوتتا كۋالىك ەتىپ, بەردەنوۆتىڭ ءار باسقوسۋدى تەكسەرىس تۋرالى قاتاڭ ەسكەرتۋدەن باستايتىنىن ايتقان بولاتىن.

«بەردەنوۆ ءار جينالىستا «انتيكور مەن ەكونوميكالىق تەرگەۋدى بارلىقتارىڭىزعا جىبەرەمىن» دەپ ۇنەمى قايتالاپ, ۇرەي تۋعىزاتىن», – دەگەن ەدى كۋاگەر.

وسى مالىمدەمەدەن كەيىن قوعامدا ابدەشوۆتىڭ ۇستالۋىن بەردەنوۆتىڭ تەكسەرىس جايلى سوزدەرىمەن بايلانىستىراتىن بولجام تاراعان. 

الايدا, ارنامىزدىڭ سەنىمدى دەرەككوز مۇنى تولىقتاي جوققا شىعارىپ وتىر. ونىڭ ايتۋىنشا ەكى وقيعا تەك ۋاقىت جاعىنان عانا سايكەس كەلگەن, ءىس جۇزىندە ەشقانداي بايلانىس جوق.

ايتا كەتەيىك, كنب ارمان ابدەشوۆتى جۇمىس ورنىندا ۇستاعان بولاتىن. شەنەۋنىك قىلمىستىق كودەكستىڭ 189-بابى («سەنىپ تاپسىرىلعان بوتەن م ۇلىكتى يەمدەنۋ نەمەسە تالان-تاراجعا سالۋ») بويىنشا ايىپتالىپ, ۋاقىتشا ۇستاۋ يزولياتورىنا قامالعان.