Shymkenttiń bas sáýletshisi tergeýge alyndy

Foto: Ertenmedia

Shymkenttiń bas sáýletshisi Arman Ábdeshovtiń ustalýy ákim orynbasary Rýslan Berdenovtiń atyshýly málimdemesimen baılanysty emes, dep habarlaıdy qandastar.kz Ertenmedia derekkózine silteme jasap.

Arnamyzǵa jetken ınsaıdqa sáıkes, Ábdeshovtyń ústinen qozǵalǵan qylmystyq is onyń buǵan deıingi qyzmetine Jambyl oblysyndaǵy jumys kezeńine qatysty.

Arman Ábdeshov 2020-2022 jyldary Jambyl oblysy ákimdiginiń sáýlet jáne qala qurylysy basqarmasyn basqarǵan. Dál sol kezeńde jasalǵan yqtımal zańsyzdyqtar endi ǵana anyqtalyp, qazirgi tergeýge negiz bolyp otyr.

Buǵan deıingi habarymyzda Berdenovtiń jınalystarda basqarma basshylaryn Antıkor jáne ekonomıkalyq tergeý qyzmetiniń tekserisimen qorqytyp kelgenin jazǵan edik. 

Kúni keshe ǵana qala ákimi Ǵabıt Syzdyqbekovtiń kómekshisi sotta kýálik etip, Berdenovtiń ár basqosýdy tekseris týraly qatań eskertýden bastaıtynyn aıtqan bolatyn.

«Berdenov ár jınalysta «antıkor men ekonomıkalyq tergeýdi barlyqtaryńyzǵa jiberemin» dep únemi qaıtalap, úreı týǵyzatyn», – degen edi kýáger.

Osy málimdemeden keıin qoǵamda Ábdeshovtiń ustalýyn Berdenovtiń tekseris jaıly sózderimen baılanystyratyn boljam taraǵan. 

Alaıda, arnamyzdyń senimdi derekkóz muny tolyqtaı joqqa shyǵaryp otyr. Onyń aıtýynsha eki oqıǵa tek ýaqyt jaǵynan ǵana sáıkes kelgen, is júzinde eshqandaı baılanys joq.

Aıta keteıik, KNB Arman Ábdeshovti jumys ornynda ustaǵan bolatyn. Sheneýnik Qylmystyq kodekstiń 189-baby («Senip tapsyrylǵan bóten múlikti ıemdený nemese talan-tarajǵa salý») boıynsha aıyptalyp, ýaqytsha ustaý ızolıatoryna qamalǵan.