قارجى جانە تولەمدەر
«شىنايى اقپارات بەرگەندەرگە 15 ملن تەڭگەگە دەيىن سىياقى كوزدەلەدى». انتيكور مالىمدەمە جاسادى

ەندى ءاربىر ازامات جەمقورلىق فاكتىلەرى تۋرالى حابارلاي الادى نەمەسە WhatsApp مەسسەندجەرى ارقىلى سىبايلاس جەمقورلىققا قارسى ءىس-قيمىل ماسەلەلەرى بويىنشا كەڭەس الا الادى.
ء«بىز جاڭا انتيكور 1424 Whatsapp-چات-بوتىنىڭ ىسكە قوسىلعانىن قۋانىشپەن حابارلايمىز. ول ءۇشىن 8 777 000 1424 نومىرىنە حابارلاما جىبەرۋ جەتكىلىكتى».انتيكوردىڭ ءباسپاسوز قىزمەتى
انتيكور 1424 WhatsApp-چات-بوت ارقىلى نە ىستەۋگە بولادى:
- سىبايلاس جەمقورلىق فاكتىلەرى تۋرالى حابارلاۋ
- سىبايلاس جەمقورلىققا قارسى ءىس-قيمىل ماسەلەلەرى بويىنشا كەڭەس الۋ.
سىبايلاس جەمقورلىق قۇقىق بۇزۋشىلىقتار تۋرالى شىنايى اقپارات بەرگەنى ءۇشىن 15,7 ملن تەڭگەگە دەيىن سىياقى كوزدەلگەن.
Zakon.kz جازعانداي, انتيكور ءوتىنىشتىڭ تولىق قۇپيالىلىعىنا كەپىلدىك بەرەدى. بارلىق حابارلامالار مىندەتتى تۇردە قارالادى جانە قۇقىق بۇزۋشىلىقتار انىقتالعان جاعدايدا قولدانىستاعى زاڭناماعا سايكەس شارالار قابىلدانادى.
الايدا, سىبايلاس جەمقورلىق تۋرالى جالعان حابارلاۋ قىلمىستىق جاۋاپتىلىققا اكەلىپ سوعاتىنىن ەسكە سالامىز.
بۇعان دەيىن جەتىسۋ وبلىسىنداعى اۋداندىق سوت توراعاسى سىبايلاس جەمقورلىققا قاتىسى بار دەگەن كۇدىككە ىلىنگەنى حابارلانعان.