شىڭعىس مۇقان زاڭگەرگە شۇيلىكتى

الەۋمەتتىك جەلىدە ەكس-شەنەۋنىك شىڭعىس مۇقاننىڭ كەدەيلەر تۋرالى پىكىرى تارادى, دەپ حابارلايدى qandastar.kz

«20 جىلدان بەرى كولىك جۇرگىزەمىن. جولدا كولىگىن سوعىپ, زارداپ شەگەتىندەردىڭ كوبى — كەدەيلەر. نەگە? سەبەبى كەدەيلەر ۇنەمى اسىعىپ جۇرەدى.

ءبىر-بىرىنە جول بەرمەيدى. قيسىنسىز جەرگە قىستىرىلىپ كەلەدى دە, اقىرىندا كولىگىن سوعىپ الادى. تەاتر, كونتسەرت زالدارىندا دا سولاي. كونتسەرت بىتكەندە, گاردەروبتىڭ تۇبىنە جينالاتىن ادامنىڭ ءبارى — كەدەيلەر.

بايلار سىرتتاي قاراپ تۇرادى. جۇرت كيىمىن الىپ بولعانشا, كۇتەدى. مەن جالپى, ادامنىڭ ساناسىن «جوقشىلىق», «توقشىلىق» دەپ ەكىگە بولەمىن. جوقشىلىق ساناسىنداعىلار ۇنەمى اسىعىس, شىدامسىز كەلەدى جانە ومىردە دە جوقشىلىق كورەدى. بۇل جەردەگى «ديسكلەيمەر» — ادامنىڭ ماتەريالدىق ەمەس, رۋحاني استارىن ايتىپ وتىرمىن», — دەيدى شىڭعىس مۇقان ءبىر پودكاستتا.

ال ەكس-شەنەۋنىكتىڭ بۇل پىكىرى بەلگىلى زاڭگەر ايگۇل ورىنبەككە جاقپاي قالدى. ول شىڭعىس مۇقاننىڭ ۆيدەوسىن جەلىدەگى پاراقشاسىندا ءبولىسىپ, جازبا قالدىردى.

«وسىنداي جىگىتتەر ءبىزدىڭ يدەولوگيامىزدى باسقاردى عوي!

كولىكتەرىن سوعىپ عانا قويماي, بىرنەشە ادامدى مىجىپ كەتەتىن بايدىڭ بالالارىن بۇلار نەگە كورمەيدى?!

ولار بىردەن اقشامەن شەشىپ كەتەتىن بايدىڭ بالالارى بولعان سوڭ, ولار جايلى ايتۋعا قورقا ما?

جاڭا جىلدا  شىڭعىس مۇقان اسىعىپ جۇرەتىن كەدەيلەرگە اقىل ايتىپتى», – دەپ جازدى ايگۇل ورىنبەك.