“شىنى بوتەلكەمەن ۇرىپ, بالكوننان سەكىرۋگە يتەرمەلەگەن”: قىزىلوردادا ازاماتتىق نەكەدەگى ايەلىن مۇگەدەك قىلعان ازاماتقا ۇكىم شىقتى

فوتو: pixabay.com

قىزىلوردا قالاسىندا ازاماتتىق نەكەدەگى ايەلىن ۇرىپ-سوعىپ, بالكوننان سەكىرۋگە يتەرمەلەگەن ەر ادامعا قاتىستى سوت ۇكىمى شىقتى. بۇل تۋرالى  qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

جابىرلەنۋشى ا ازاماتتىق نەكەدەگى كۇيەۋى سوتتالۋشى ج-نىڭ ۇيالى تەلەفونىنا تىركەلگەن ابونەنتتىك ءنومىرىن الىپ, ءوزىنىڭ تەلەفونىنا سالىپ, بەلگىسىز ايەلمەن حابارلامالارىن وقىعان. كۇيەۋىنىڭ سمس-حاتتاردىڭ كەسىرىنەن ارالارىندا جانجال تۋعان.

وسى ساتتە سوتتالۋشى جابىرلەنۋشىنى بالاعاتتاپ, جۇلقىلاپ, بىرنەشە رەت اياۋسىز, اسا قاتىگەزدىكپەن ۇرىپ-سوعىپ, ەدەنگە قۇلاتىپ, باسىنان شىنى بوتەلكەمەن ۇرىپ, ونىڭ ۇيالى تەلەفونىن الىپ قويعان.

جابىرلەنۋشى ومىرىنە قاۋىپ ءتونىپ تۇرعانىن جانە ءارى قاراي ءومىر ءسۇرۋ مۇمكىندىگىنەن ايىرىلىپ قالۋىن سەزىنىپ, ازاماتتىق نەكەدەگى كۇيەۋىنىڭ ۇرىپ-سوعۋ ارەكەتتەرىنەن قۇتىلۋ ماقساتىندا قوناق بولمەدەگى لودجيادان ءوز ەركىمەن سەكىرگەن. ناتيجەسىندە جابىرلەنۋشى ا-نىڭ دەنساۋلىعىنا «اۋىر» دارەجەلى زيان كەلىپ, ءى توپ مۇگەدەكتىگى تاعايىندالعان.

سوت تالقىلاۋىندا سوتتالۋشى وزىنە تاعىلعان ايىپتى مويىندامادى. 2022 جىلعى سوت-مەديتسينالىق ساراپتاماسىنىڭ قورىتىندىسىنا سايكەس جابىرلەنۋشىنىڭ دەنساۋلىعىنا «اۋىر» دارەجەدەگى زيان, ال 2024 جىلعى قوسىمشا ساراپتاما قورىتىندىسىنا سايكەس, جەڭىل دارەجەدەگى زيان كەلگەنى بەكىتىلگەن.

جابىرلەنۋشى ا ماتەريالدىق شىعىن جانە مورالدىق زيان ءوندىرۋدى سۇراعان.

“سوتتالۋشى ا قىلمىستىق كودەكستىڭ 105-بابىنىڭ 1-بولىگىندە كوزدەلگەن قىلمىستىق قۇقىق بۇزۋشىلىقتار جاساعانى ءۇشىن كىنالى دەپ تانىلىپ, 1 جىل 6 اي باس بوستاندىعىنان ايىرۋ جازاسى تاعايىندالىپ, قىلمىستىق-اتقارۋ جۇيەسىنىڭ قاۋىپسىزدىگى بارىنشا تومەن مەكەمەلەردە وتەۋگە بەلگىلەندى, قىلمىستىق كودەكستىڭ 49-بابى نەگىزىندە «مايور» شەنىنەن ايىرىلدى”, – دەلىنگەن سوت ۇكىمىندە.

سونىمەن قاتار 4 054 181 تەڭگە ماتەريالدىق شىعىن جانە 5 000 000 تەڭگە مورالدىق زيان ءوندىرىلدى. ۇكىم زاڭدى كۇشىنە ەنگەن جوق.

ەسكە سالساق, قىزىلوردالىق جىگىت 21 جاستاعى ايەلىن ۇرىپ ءولتىردى دەگەن كۇدىككە ءىلىندى.