“Shyny bótelkemen uryp, balkonnan sekirýge ıtermelegen”: Qyzylordada azamattyq nekedegi áıelin múgedek qylǵan azamatqa úkim shyqty

Foto: pixabay.com

Qyzylorda qalasynda azamattyq nekedegi áıelin uryp-soǵyp, balkonnan sekirýge ıtermelegen er adamǵa qatysty sot úkimi shyqty. Bul týraly  qandastar.kz Stan.kz aqparat agenttigine silteme jasap habarlaıdy.

Jábirlenýshi A azamattyq nekedegi kúıeýi sottalýshy J-nyń uıaly telefonyna tirkelgen abonenttik nómirin alyp, óziniń telefonyna salyp, belgisiz áıelmen habarlamalaryn oqyǵan. Kúıeýiniń sms-hattardyń kesirinen aralarynda janjal týǵan.

Osy sátte sottalýshy jábirlenýshini balaǵattap, julqylap, birneshe ret aıaýsyz, asa qatygezdikpen uryp-soǵyp, edenge qulatyp, basynan shyny bótelkemen uryp, onyń uıaly telefonyn alyp qoıǵan.

Jábirlenýshi ómirine qaýip tónip turǵanyn jáne ári qaraı ómir súrý múmkindiginen aıyrylyp qalýyn sezinip, azamattyq nekedegi kúıeýiniń uryp-soǵý áreketterinen qutylý maqsatynda qonaq bólmedegi lodjııadan óz erkimen sekirgen. Nátıjesinde jábirlenýshi A-nyń densaýlyǵyna «aýyr» dárejeli zııan kelip, I top múgedektigi taǵaıyndalǵan.

Sot talqylaýynda sottalýshy ózine taǵylǵan aıypty moıyndamady. 2022 jylǵy sot-medıınalyq saraptamasynyń qorytyndysyna sáıkes jábirlenýshiniń densaýlyǵyna «aýyr» dárejedegi zııan, al 2024 jylǵy qosymsha saraptama qorytyndysyna sáıkes, jeńil dárejedegi zııan kelgeni bekitilgen.

Jábirlenýshi A materıaldyq shyǵyn jáne moraldyq zııan óndirýdi suraǵan.

“Sottalýshy A Qylmystyq kodekstiń 105-babynyń 1-bóliginde kózdelgen qylmystyq quqyq buzýshylyqtar jasaǵany úshin kináli dep tanylyp, 1 jyl 6 aı bas bostandyǵynan aıyrý jazasy taǵaıyndalyp, qylmystyq-atqarý júıesiniń qaýipsizdigi barynsha tómen mekemelerde óteýge belgilendi, Qylmystyq kodekstiń 49-baby negizinde «maıor» sheninen aıyryldy”, – delingen sot úkiminde.

Sonymen qatar 4 054 181 teńge materıaldyq shyǵyn jáne 5 000 000 teńge moraldyq zııan óndirildi. Úkim zańdy kúshine engen joq.

Eske salsaq, Qyzylordalyq jigit 21 jastaǵy áıelin uryp óltirdi degen kúdikke ilindi.