قازاقستانعا مەملەكەتتىك ساپارى الدىندا قىتاي حالىق رەسپۋبليكاسىنىڭ توراعاسى سي تسزينپين ەلىمىزدىڭ بۇقارالىق اقپارات قۇرالدارىنا ارناپ اۆتورلىق ماقالا جازدى, دەپ حابارلايدى qandastar.kz.
وندا قىتاي باسشىسى ەكىجاقتى ساۋدانىڭ دامۋى, ۆيزاسىز رەجيمنىڭ ارتىقشىلىقتارى تۋرالى ايتىپ, قازاقستاننىڭ تاۋەلسىزدىگىن قولداۋعا ۋادە بەردى. سي ءتسزينپيننىڭ ماقالاسىن «قازاقپارات» اگەنتتىگى جاريالاعان.
«مەن زور ءۇمىت ارتىپ وتىرعان الداعى ساپار جاڭا قازاقستاننىڭ جەتىستىكتەرى مەن بۇگىنگى كەلبەتىنە ءسۇيىنىپ قاراپ, تامسانۋعا عانا ەمەس, پرەزيدەنت قاسىم-جومارت توقاەۆپەن ەكىجاقتى سەرىكتەستىكتىڭ وزەكتى ماسەلەلەرىن تالقىلاپ, شىۇ-نى ءارى قاراي دامىتۋدىڭ جانە قىتاي-قازاق قارىم-قاتىناسىنىڭ باسىم باعىتتارىن ايقىنداۋعا مۇمكىندىك بەرەدى», – دەپ جازادى سي تسزينپين.
قىتاي باسشىسى ەكى ەلدىڭ ەكونوميكالىق بايلانىسى مەن ساۋدا-ساتتىعىنىڭ ماڭىزى جوعارى ەكەنىن اتاپ وتەدى. قازىرگى كەزدە قىتاي قازاقستاننىڭ نەگىزگى ساۋدا سەرىكتەسى بولىپ وتىر.
– ەكىجاقتى ساۋدا-ساتتىقتىڭ بىلتىرعى كولەمى رەكوردتىق دەڭگەيدەگى 41 ملرد اقش دوللارىنا جەتتى. قىتاي – قازاقستاننىڭ نەگىزگى ساۋدا سەرىكتەسى بولىپ وتىر جانە قازاقستاندىق تاۋارلاردىڭ ءىرى يمپورتتاۋشىسى. جاڭاتاس جەس-ءى, تۇرعىسىن گەس-ءى, سياقتى ستراتەگيالىق تۇرعىدان ماڭىزدى جوبالار تابىستى ىسكە قوسىلدى. شىمكەنت مۇناي وڭدەۋ زاۋىتىندا جاڭعىرتۋ جۇمىستارى مەن كۇردەلى جوندەۋ اياقتالدى. قىتاي-قازاقستان مۇناي-گاز قۇبىرلارى قاۋىپسىز ءارى تۇراقتى نەگىزدە جۇمىس ىستەپ تۇر, اۋىلشارۋاشىلىعى ونىمدەرىنىڭ بارلىق ءتۇرىن جەتكىزۋگە بايلانىستى كەدەندىك راسىمدەردى جەدەلدەتەتىن جاسىل ءدالىز قۇرىلدى. قىتايلىقتاردىڭ داستارحانىندا قازاقستاننىڭ ساپاسى جوعارى, ەكولوگيالىق تۇرعىدان تازا اۋىلشارۋاشىلىعى ونىمدەرى كۇن ساناپ كوبەيىپ كەلەدى, – دەدى قىتاي باسشىسى.
قحر توراعاسىنىڭ ايتۋىنشا, ەكى ەل اراسىندا جوعارى تەحنولوگيالار سالاسىنداعى ىنتىماقتاستىقتى دامىتۋ ماڭىزدى. ولاردىڭ ىشىندە جاڭا قۋات كوزدەرى, تسيفرلىق ەكونوميكا, جاساندى ينتەللەكت, ترانسشەكارالىق ەلەكتروندى كوممەرتسيا, اۆياتسيا جانە عارىش سالاسى بار.
