ءسىم ىسكە كىرىستى: دەپۋتات پاكىستانداعى قانداستاردى قۇتقارۋ ماسەلەسىن كوتەردى

فوتو: اشىق دەرەككوز

ءماجىلىس دەپۋتاتى ەرلان سايروۆ «QASQA JOL» YouTube باعدارلاماسىندا پاكىستانداعى ەتنيكالىق قازاقتاردىڭ اۋىر جاعدايىنا الاڭدايتىنىن ايتتى, دەپ جازدى qandastar.kz

حالىق قالاۋلىسىنىڭ ايتۋىنشا, پاكىستاننىڭ كاراچي قالاسىنان قازاقتار بايلانىسقا شىعىپ, ەكى جىل بۇرىن اۋعانستاننان 40 وتباسى – شامامەن 300 قازاقتىڭ پاكىستانعا بوسىپ كەلگەنىن حابارلاعان.

«ولارعا قازاقستاننىڭ پاكىستانداعى ەلشىسى كەلىپ, جاعدايمەن تانىسىپ, كومەكتەسۋگە ۋادە بەرگەن. الايدا 30 تامىز كۇنى پاكىستان بيلىگى بۇل 300 قازاقتى قايتادان اۋعانستانعا دەپورتاتسيالايتىنىن مالىمدەدى«, – دەدى ەرلان سايروۆ.

دەپۋتات بۇل مالىمەتتى ەستي سالىسىمەن سىرتقى ىستەر مينيسترلىگىنە حابارلاسقانىن ايتىپ ءوتتى. ۆەدومستۆو ماسەلە تۋرالى حاباردار ەكەنىن راستاعانىمەن, ازاماتتاردىڭ قولىندا ولاردىڭ «قازاق ۇلتىنا» تيەسىلى ەكەنىن دالەلدەيتىن قۇجاتتار بولماعاندىقتان, رەسمي كومەك كورسەتۋ قيىن ەكەنىن العا تارتقان.

دەگەنمەن, ءتيىستى شارالار ءجۇرىپ جاتىر. قازىرگى تاڭدا ءسىم قازاقستان ەلشىلىگى ارقىلى پاكىستان تاراپىمەن كەلىسسوز جۇرگىزۋدە. سونىڭ نەگىزىندە ولاردى اۋعانستانعا دەپورتاتسيا جاساماۋ ماسەلەسى زاڭ اياسىندا قارالۋدا.

«بۇل ماسەلەنى شەشۋ ءۇشىن قايتادان اۋعانستانعا بارىپ, ءتيىستى انىقتامالار الۋ قاجەت ەكەن. بىراق ول ەلگە بارۋ – بۇل ازاماتتار ءۇشىن اسا قاۋىپتى. سوندىقتان مەن ۇكىمەت باسشىسى ولجاس بەكتەنوۆكە جانە سىرتقى ىستەر ءمينيسترى مۇرات نۇرتىلەۋگە ارنايى ۇندەۋ جولدادىم. جۇمىستار جۇرگىزىلۋدە», – دەپ مالىمدەدى ەرلان سايروۆ.

دەپۋتات قازاقستان تاراپىنان شەشىم تابىلماعان جاعدايدا, بۇۇ بوسقىندار ىستەرى جونىندەگى جوعارعى كوميسسارى باسقارماسىنا ءوتىنىش بەرىپ, قانداستاردى رەسمي بوسقىن رەتىندە مويىنداتۋ قاجەت ەكەنىن اتاپ ءوتتى.