SIM iske kiristi: Depýtat Pákistandaǵy qandastardy qutqarý máselesin kóterdi

Foto: ashyq derekkóz

Májilis depýtaty Erlan Saırov «QASQA JOL» YouTube baǵdarlamasynda Pákistandaǵy etnıkalyq qazaqtardyń aýyr jaǵdaıyna alańdaıtynyn aıtty, dep jazdy qandastar.kz

Halyq qalaýlysynyń aıtýynsha, Pákistannyń Karachı qalasynan qazaqtar baılanysqa shyǵyp, eki jyl buryn Aýǵanstannan 40 otbasy – shamamen 300 qazaqtyń Pákistanǵa bosyp kelgenin habarlaǵan.

«Olarǵa Qazaqstannyń Pákistandaǵy elshisi kelip, jaǵdaımen tanysyp, kómektesýge ýáde bergen. Alaıda 30 tamyz kúni Pákistan bıligi bul 300 qazaqty qaıtadan Aýǵanstanǵa deportaııalaıtynyn málimdedi«, – dedi Erlan Saırov.

Depýtat bul málimetti estı salysymen Syrtqy ister mınıstrligine habarlasqanyn aıtyp ótti. Vedomstvo másele týraly habardar ekenin rastaǵanymen, azamattardyń qolynda olardyń «qazaq ultyna» tıesili ekenin dáleldeıtin qujattar bolmaǵandyqtan, resmı kómek kórsetý qıyn ekenin alǵa tartqan.

Degenmen, tıisti sharalar júrip jatyr. Qazirgi tańda SIM Qazaqstan Elshiligi arqyly Pákistan tarapymen kelissóz júrgizýde. Sonyń negizinde olardy Aýǵanstanǵa deportaııa jasamaý máselesi Zań aıasynda qaralýda.

«Bul máseleni sheshý úshin qaıtadan Aýǵanstanǵa baryp, tıisti anyqtamalar alý qajet eken. Biraq ol elge barý – bul azamattar úshin asa qaýipti. Sondyqtan men Úkimet basshysy Oljas Bektenovke jáne Syrtqy ister mınıstri Murat Nurtileýge arnaıy úndeý joldadym. Jumystar júrgizilýde», – dep málimdedi Erlan Saırov.

Depýtat Qazaqstan tarapynan sheshim tabylmaǵan jaǵdaıda, BUU Bosqyndar isteri jónindegi Joǵarǵy komıssary basqarmasyna ótinish berip, qandastardy resmı bosqyn retinde moıyndatý qajet ekenin atap ótti.