الەم جاڭالىقتارى
«سيني كيت» ويىنىنىڭ اۆتورى سوتتالدى
فوتو: نوۆوسيبيرسك سوت باسقارماسى
رەسەيدەگى نوۆوسيبيرسك سوت باسقارماسىندا «سيني كيت» ارناسىنىڭ اۆتورى يليا پوگيبالوۆقا ۇكىم شىعارىلدى. ول 9 جىلعا باس بوستاندىعىنان ايىرىلدى, دەپ جازدى qandastar.kz
پوگيبالوۆقا ءوز-وزىنە قول جۇمساۋعا يتەرمەلەۋگە باعىتتالعان ارەكەتتى ۇيىمداستىرۋ, ينتەرنەتتەگى توپ ارقىلى كامەلەتكە تولماعانداردى ءوز-وزىنە قول جۇمساۋعا يتەرمەلەۋ جانە كامەلەتكە تولماعاندى قىلمىس جاساۋعا تارتۋ باپتارى بويىنشا ايىپ تاعىلعان.
2023 جىلى پوگيبالوۆ باسقا ادامداردىڭ ولىمىنە دەگەن پاتولوگيالىق قىزىعۋشىلىعىنىڭ ناتيجەسىندە «سيني كيت» ارناسىن قۇرعان. ول ارناسىنىڭ جازىلۋشىلارىن «ءوز-وزىنە قول جۇمساۋعا دايىنداۋ ءۇشىن ارنايى تاپسىرمالار ورىنداۋعا» يتەرمەلەگەن. ايىپتاۋعا سايكەس, پوگيبالوۆ ءوز قۇرباندارىن سۋيتسيدكە دەيىن جەتكىزۋدى ماقسات ەتكەن.
پوگيبالوۆ 9 جىلعا باس بوستاندىعىنان ايىرىلدى. وعان قوسا ءتورت جىل بويى كەز كەلگەن ينتەرنەت-رەسۋرستى باسقارۋىنا تىيىم سالىندى.
«سيني كيت» —جاسوسپىرىمدەرگە تاپسىرما بەرۋ ارقىلى ءوز-وزىنە قول جۇمساۋعا اپاراتىن ويىن. بۇل تاپسىرمالار جالعان اتپەن تىركەلگەن كۋراتورلار ارقىلى بەرىلگەن.
